50-с сыллар саҥаларыттан бэчээккэ, киһиэхэ майгынныыр «хаар киһитин» сир араас муннуктарыгар көрбүттэрин туһунан омуннаах солуннар тарҕаммыттар. Онтон Саха сиригэр кыыллыйбыт киһи дуу, кыыл дуу баарын туһунан үһүйээн былыргыттан баара. П. Л. Драверт диэн учуонай күннүгэр ону маннык бэлиэтээбит: «Лена өрүһүнэн Булуҥ Күһүругэр устан истэхпинэ Дьааҥы хайаларыгар чучунаа-мүлэн диэн баарын кэпсээбиттэрэ. Дьугдьуур хайатын ааһаргар сэрэх буолуохтааххын, онно баар мүлэн киһини өлөрүөн сөп. Биһиги кинини «Дьугдьуур иччитэ» диэн бэлэх-туһах биэрэбит. Тохтоон уот отуннахха булчут курдук мастарынан хаххаланан үөмэн кэлэр. Орто киһиттэн намыһах, түү таҥастаах, олооччулаах, кыргыллыбатах баттахтаах, салаҥ чаачар саалаах, тамныыр таастаах, өттүгэр иилиммит быһыччалаах, чокуурдаах буолар. Саҥата диэн — ыҥырҕааһын. Чугаһаат, тохтоло суох чаачарынан ытыалыыр, тааһынан тамныыр уонна куотан хаалар. Олохтоох дьон кэпсииринэн: хаспахха олорор, таба үөрүн күрэтэр, ампаары халыыр. Ол иһин сорохтор кинини өлөрөн кэбиһэллэр эбит».
