Зинаида Архипова «Көс кут» саҥа хоһооннорун хомуурунньугуттан икки хоһоон:
Бурдукка буккуллубакка
Хайдах тиэстэ охсоҕун?
Сыыһа-халты үктэммэккэ
Хайдах олох олороҕун?
Кыа хааҥҥа биһиллибэккэ
Булду хайдах астыыгын?
Кырдьык эрэ кыбыныылаах
Хайдах тыыннаах сылдьаҕын?
Үүммүт маһы кэрдибэккэ
Хайдах кутаа оттоҕун?
Буруйданан умайбакка
Хайдах киһи буолаҕын?
Түүнү кытта хоонньоспокко
Хайдах күнү көрсөҕүн?
Хараҥалыын алтыспакка
Хайдах сырдаан көстөҕүн?
ххх
Хара тыаттан эр тойонум
Эргиллэрин кэтэһэ,
Көмүс дуйдаах күн алаадьы
Хобордооххо эргийэр.
Сөрүүн сүөгэй үрүҥ күөлгэ
Күн ытыгым сөтүөлүүр,
Күүгэн былыт күөрчэхтэнэ
Кытыйаҕа үҥкүүлүүр.
Оттуллубут буор оһоҕум
Кыһыл тылын салбанар,
Оргууй тэбэр күөс хоргуна
Хамыйахтан баранар.
Түннүк-харах, халҕан кулгаах —
Таһырдьалыын иһийии,
Хара тыаттан күн тойону
Эргиллэрин кэтэһии.