1986 сыллаахха Таатта түмэлин пуондатыгар сэдэхтик көстөр туос маллаах иһити, Ытык Күөл олохтооҕо, штаты таһынан үлэһит Н.И. Попов бэлэхтээбитэ. Кини түмэл атаҕар туруутугар үгүс сыаналаах малы биэрбитэ.
Маллаах иһит ньолбоҕор быһыылаах, хаппаҕар «К. Оросина 1872 с.» диэн суруктаах. Кыыс-дьахтар солко таҥаһын угарыгар ананан оҥоһуллубут. Тигиитэ, ойуута-мандара сиэдэрэй, хас биирдии киэргэлин быыһыгар сүлүүдэ уган тигиллибит, бэрт уус тарбахтаах, имигэс илиилээх иистэнньэҥ оҥорбута көстөр.
К. Оросина диэн кимий? Боотурускай улуус I Игидэй нэһилиэгин сис баайа, 800-чэ сүөһүлээх Г.В. Оросин соҕотох мааны кыыһа Кэтириинэ буолар. Кыраайы үөрэтээччи Е.Д. Андросов «Оруоһуттар» диэн кинигэтигэр маннык суруйар: «Кэтириинэни сааһын кыл-мүччү ситэрин кытта, аҕата Чэппиэдэй Алданын баайыгар, Байаҕантай улууһугар кулубалыы сылдьыбыт Доропуун Баһылайабыс Ностуруойап улахан уолугар Бүөтүргэ, 1870 сыл ортотун диэки быһыылаах, эргэ биэрэн сүгүннэрэн ыыппыт. Дьон-сэргэ билэринэн, Кэтириинэлээх Бүөтүр 11 оҕону төрөтөн киһи-хара оҥорбуттар. Денис диэн уоллара Баайаҕаттан Ксения диэн, уруккута кулуба буола сылдьыбыт П.М. Слепцов улахан кыыһын ойох ылан, Николай Денисович уонна Анна Денисовна диэн кэлин биллэр суруйааччы буолбут оҕолору төрөппүттэр».
Г.В. Попов «Хантан хааннаахпытый?» диэн кинигэтигэр суруллубуттан сабаҕалаатахха, маллаах иһит Кэтириинэ Оруоһуна-Ностуруойаба киэнэ буолан тахсар, сүктэн барарыгар тигиллибит буолуон сөп. Кини суруйааччы Ньукулай Ностуруойап аҕатынан эбэтэ буолар.
Сиһилии манан киирэн ааҕыҥ (куар-код)
(төлөпүөнүҥ камератын холбоо уонна кыҥаа, сигэ таҕыстаҕына, онон киир)
Елизавета Ушницкая, Таатта.
