Москваҕа Улахан Кремлевскай дыбарыас саалатыгар бүтүн Арассыыйатааҕы «Сыл бастыҥ ыала-2024» куонкурус кыайыылаахтарын наҕараадалааһын дьоро түгэнэ бэҕэһээ, алтынньы 18 күнүгэр, буолла. Бу үрдүк аатынан Саха сирин икки дьиэ кэргэнэ бэлиэтэннэ!
Ол курдук, Муома улууһун Улахан Чыыстай национальнай нэһилиэк көс олохтоох элбэх оҕолоох Василий уонна Елена Соловьевтар «Семья – хранитель традиций» номинацияҕа бүтүн Арассыыйа кыайыылаахтарынан буолбуттара.
Оттон Ньурба улууһун эдэр ыала Константин уонна Валерия Владимировтар «Народная симпатия» онлайн-куоластааһыҥҥа кыайан, бастыҥ ааты сүкпүттэрэ. Дойду үрдүнэн биллэриллибит Дьиэ кэргэн сылыгар Саха сирин дьиэ кэргэттэрэ дойду таһымнаах күрэс түһүлгэтигэр бастыҥнарынан буолбуттара кэрэхсэтэр!
«Далбар Хотун» Саҥа дьыл бырааһынньыгын көрсө тахсар сурунаалыгар Муома улууһун Улахан Чыыстай национальнай нэһилиэк көс олохтоох элбэх оҕолоох Василий уонна Елена Соловьевтар туһунан ыстатыйа тахсыаҕа. Ыстатыйа улахан биһирэбили ылыа диэн эрэнэбит.
