Саҥа сылга “Алаһа” рубрика бастакы ыалдьыттарынан Мария уонна Егор Дьячковскайдар буолаллар. Кинилэр дьоллоох Дьокуускайга дьиэ-уот туттан быр-бааччы олорор элбэх оҕолоох ыал. Дьоруойдарым ааспыт сайыны тутуу үлэтин быыһыгар атаардылар. Тус бэйэм сайыҥҥы кыра дьиэ туттан эрэллэр дии санаабытым, олох даҕаны баанньык буолан биэрдэ. Чааһынай дьиэҕэ олорор дьон диэх курдук, үөрүйэхтик туттан-хаптан номнуо үлэҕэ киллэрбиттэр. Буоллун—хааллын диэн буолбакка, ис сүрэхтэриттэн кыһаллан оҥостубуттара тута харахха быраҕыллар. Киһи эрэ олоруоҕун курдук тупсаҕай тутуулаах баанньыкка ыалдьыттаан ааһыаҕыҥ эрэ.
Баанньык алта да түөртээх, 24 кв м иэннээх, 18 да 18-таах буруус маһынан тутуллубут. Көҥдөйүн тутуу хампаанньатыгар туттарбыттар, оттон иһинээҕи үлэтин хаһаайын бэйэтэ оҥорбут. Киирээти кытта сынньанар сирдээх. Манна аһыыр остуол, сытан ыларга сымнаҕас олбохтоох мас ыскамыайка баар уонна 1 м — 1.30 см кээмэйдээх улахан түннүктээх. Хаһаайыттар уот боруобатыгар, араарынньыктарга тиийэ болҕомтолорун уурбуттар. Ол курдук, “ретро” истииллээх уот тэриллэрэ, икки араас люстра баанньык ис барааныгар олус барсаллар уонна киэргэтэллэр (паарданар хоско итиини тулуйар аналлаах боруобат тардыллыбыт).
Хаһаайын: “Баанньыкпыт тэбэр сүрэҕэ – оһохпут”, – диэн кэпсиир. Кырдьык даҕаны,
маннык оһох баанньыкка нус барааны биэрэр. “Термофор” диэн фирма бэлэм оһоҕун ылан туруорбуттар, кэрэ көстүүлээх буоллун диэн камин курдугу талбыттар. Бу оһох 18 кубометрдаах баанньыкка аналлаах эбит. Тыйыс тымныыга 2-3 чааһынан сылытар кыахтаах, аллараа өттүгэр салгыны салайардаах. Оһох иннигэр муостаҕа тимир лииһи тэлгэтэллэрэ эрэ хаалбыт.
Салгыы суунар хоско ааһыахха. Манна тиит мастан оҥоһуллубут ыскамыайка турар.Ордук бу мас ууттан куттаммат уонна туох да буолбат эбит. Муостатын халыйыыта (уклон) ортотугар буолан, уу мунньустубакка түһэ турар. Оттон эркинин харыстаан, аналлаах арыынан соппуттар. Ону таһынан, итии ууну ылар кыраан оҥорбуттара олус табыгастаах буолууһу.
Суунар сиртэн тута паарданар хоско киирэбит. Манна оһох кэннигэр таастары ититэр уонна ууну сылытар 40 лиитэрэлээх иһит баар. Оһох оттулунна да сылыйан бараллар. Хаһаайын: “Алта киһиэхэ саамай сөптөөх эбит”, – диэн санаатын үллэстэр. Оттон эркинигэр “Изоспан Fb” диэн сууну сыһыаран баран “Евровагонка” хаптаһыннары саайбыт. Ыскамыайка каркаһын тииттэн, оттон сирэйин липа мастан оҥорбут. Липа итиигэ улаханнык сылыйбат диэн хайгыыллар. Ону таһынан кыра түннүктээх. Өскөтүн аһара итийдэҕинэ түннүгү арыйан сөрүүкэтэллэр эбит.
ТҮБҮКТЭЭХ, СЫЛААЛААХ ҮЛЭ КЭННИТТЭН МАННЫК БААННЬЫККА ЫБЫЛЫ СУУНАР, ДУОҺУЙА СЫННЬАНАР ТӨҺӨЛӨӨХ ҮЧҮГЭЙЭ БУОЛУОЙ? “ЧЭПЧЭКИ ТЫЫН БУОЛЛУН!” ОЛ ЭБЭТЭР “С ЛЕГКИМ ПАРОМ!”
Венера Охлопкова
