Агафья Тарасова
Өбүгэлэрбит араас оту, тиит, бэс сутукатын үрүҥ аска эбии
буккуйан ас амтанын тупсараллара, иҥэмтэлээҕин билэн
тутталлара. Бу үтүө үгэһи, биһиги, аныгы үйэ дьоно аспытыгар
эмиэ кыралаан туһанабыт. Кыралыы да тутуму үрүҥ аска эбэн
доруобуйабытын көрүнэрбит тоҕоостоох, төрүт аспыт эппитигэр-
сииммитигэр түргэнник иҥэрэ чахчы.
Бэс сутуката — бэс мас хатырыгын иһигэр баар чараас судургутук
хахтанан кэлэр эттик. Сибиэһэйигэр сымала сыттаах, бэс иннэтэ
амтаннаах буолар.
Бэс эрэ буолбакка, тиит сутукатын эмиэ туһаналлар.
— Бэс сутукатын хатаран, бурдук оҥорон астанар буолбутум
ыраатта. Кини киһи уопсай туругун бөҕөргөтөр, тупсарар уратылаах.
Сутуканы үүнэ турар мастан буолбакка охторуллубут мастан
сибиэһэйдии субурутан ылан хатаран туттуллар. Чараас сиидэ таҥаска
сытыаран күн устата хатарыллар. Хаппыт сутуканы аныгы үйэҕэ
мээккэлиир судургу, холобура, блендерга ньыһыйтарыахха сөп.
Оччотугар кини бурдук курдук буолан тахсар. Бэлэм сутуканы
бааҥкаларга эбэтэр таҥастан тигиллибит мөһөөччүккэ сыл устата уура
сылдьан туттуллар. Дьиэтээҕи температураҕа, сиигэ суох сиргэ
хаһааныллар.
Бэс сутукатын ханнык баҕарар кэмҥэ ылаллар эрээри,
саас хастыыр ордук. Бу кэмҥэ сүмэһинэ күүстээх буолар.
Ырысыаптар
Бэс сутукалаах сахалыы лэппиэскэ
Суорат эбэтэр үүт — 1 ыстакаан
Туус — быһа холоон
Сымыыт — 1 устуука
Бэс сутуката — 4 улахан ньуоска
1 суортаах бурдук (крупнозерновой) — илии тиэстэҕэ сыстыбат буолуор диэри
кутуллар.
Тиэстэни мэһийэн баран 15 мүнүүтэ сынньатабыт, тэнитэн
духуопкаҕа саһарыар диэри буһарабыт. Таһааран баран ынах
арыытынан сотон сымнатан, минньэтэн биэрэбит. Суоратынан
оҥоһуллар буоллаҕына суодалаамыахха сөп, оттон үүтүнэн астаатахха
барбах эрэ эбиэххэ сөп.
Бэс сутукалаах суорат
Суоракка көннөрү мээккэлэммит сутуканы амсайан көрөн
кутабыт, туруора түһэн баран сиибит. Манна сибиэһэй сугун, отон,
моонньоҕон таммалатан, кыратык саахар эбэн амтанын араастаан
уларыта сылдьан иһиэххэ сөп.
