Сэтинньи 14 күнүгэр “Сахамедиа” медиа-кииҥҥэ “Загляни в мир бизнес-леди” бырайыак тэриллибитэ 10 сылынан «төгүрүк остуол» ыытылынна. Бу тэрээһин туһунан “Далбар хотун” сурунаал сиһилии билистэ.
Евдокия Ефимова, “Мой бизнес” киин генеральнай дириэктэрин солбуйааччыта:
- Бүгүҥҥү тэрээһини “Загляни в мир бизнес-леди” бырайыак чэрчитинэн “Союз женских организаций Республики Саха (Якутия)” уонна “Мой бизнес” киин буолан тэрийдибит. Бу бырайыак олохтоммута уон сылын бэлиэтиибит уонна «төгүрүк остуолга» олорон өссө сайыннарар, тупсарар, кэҥэтэр туһунан кэпсэттибит. Бырайыакка эрдэ кыттыбыт уон биэс эксперт сибээскэ тахсаннар уопуттарын, санааларын үллэһиннилэр. Дьахтар урбааныгар туох тиийбэтин, туох көмө наадатын эмиэ ырыттыбыт.
Туйаара Андреева, фотограф, “Загляни в мир бизнес-леди” бырайыак көҕүлээччитэ:
- Бу бырайыагы уон сыл анараа өттүгэр, Анжелика Андееваны уонна Туяна Андрееваны кытта билсэммин хаартысканан быыстапка тэрийии туһунан идиэйэбин кэпсээбитим. Онуоха кинилэр тута өйөөннөр, эбии сүбэ-ама биэрэннэр “бизнес-ледилары” хаартыскаҕа түһэрэн уонна кинилэр ситиһиилэрин сайка суруйан дьоҥҥо-сэргэҕэ, киэҥ эйгэҕэ таһаарыахха диэн буолбута. Урбаан миниистирэ Екатерина Кормилицина өйөбүлүнэн барыта олус түргэнник табыллан хаалбыта. Бырайыакка ол кэмҥэ бизнес эйгэтин чаҕылхай кыргыттара кыттыбыттара. Билигин күн-дьыл уларыйа турар, «нетворкинг» диэн олус сайынна. Оччолорго биһиги саҕалаабыт үлэбит бүгүҥҥү күҥҥэ “нетворкинг” дэнэр буолла. Онон бу үлэбитин сөргүтэбит, кэҥэтэбит. Ахсынньы ыйтан коммерческай бырайыак тэрийиэхпит. Бизнес эйгэтигэр саҥардыы киирэн эрэр эбэтэр саҕалыы да илик, үлэлэрин эйгэтин уларытыан баҕалаах кыргыттары түмэммит үс ый устата үөрэтиэхпит уонна кинилэргэ күүс-көмө буолуохпут. Бу кэм устата элбэҕи билэн, сатабыллара үрдээн бизнес эйгэтигэр үлэлииргэ элбэх холобур ылан, бэлэмнэн тахсыахтара. Онон былаан элбэх, былаан киэн.
Туяна Андреева, “Союз женских организаций Якутии” координатора:
- Биһиги оччолорго, “Женщины меняющие мир” аан дойдутааҕы конференцияҕа сылдьан баран “Артик-леди” диэн уопсастыбаннай пуонданы тэрийбиппит. Пуонда сүрүн сыалынан социальнай бырайыактары өйөөһүн этэ. Ол көмөтүнэн “Белая Роза”, “Розовая чайка” тэрилтэлэр, ону сэргэ бу Туяна Андреева бырайыага өйөбүл ыланнар үлэлэрин саҕалаабыттара. 2025 сылга биһиги өрөспүүбүлүкэбитигэр «Дьахтар хамсааһына» тэриллибитэ 100 сылын бэлиэтиир, онно бу бырайыак “Загляни в мир бизнес-леди” хайаатар даҕаны кыттыаҕа. Эһиилги сыл ыам ыйыгар урбаан күнүн чэрчитинэн хаартысканан быыстапкабытын тэрийиэхпит.
Надежда Васильева, “Психологический центр Надежды Васильевой” киин салайааччыта, урбаанньыт:
- Мин урбаан эйгэтигэр үлэлиир буоламмын этиэхпин баҕарабын – «нетворкинг» диэн биһиэхэ олус наадалаах. Ол эбэтэр, бэйэ икки ардыгар уопут атастаһыыта, көрсүһүүлэр, сүбэ-ама үллэстиитэ буолар. Куораппыт кыра буолан бары бэйэ-бэйэбитин билэбит, билсэбит. Ол иһин, өрөспүүбүлүкэбит дьонугар-сэргэтигэр туһалаах, наадалаах тэрилтэлэр баар буолалларын туһугар урбаанньыттар биир сүбэнэн үлэлиирбит олус наадалаах. Онно бу дьахталлар хамсааһыннара баара күүс-көмө буолар.
