Элбэх оҕолоох эдэр ыал Галина уонна Иван Бысыкатовтар сынньанар дьиэлэригэр (Skyhouse.ykt) ыалдьыттыахха. Ыал ийэтэ сэттис сылын кондитерынан үлэлиир. Ордук уруу туортарын оҥорор уонна маастар-кылаастары ыытар. Оттон кэргэнэ хас эмэ этээстээх баараҕай туортар конструкцияларын тутан биэрэр, туттуллар бородуукталары атыылаһан аҕалар, бэлэм туортары илдьэн биэрэр “дуоһунастаах”. Ону таһынан, саҥа тутуллубут сынньанар дьиэлэринэн дьарыктанар.
Дьоруойдарым икки сыллааҕыта күһүн атын хайысханан саҥа бырайыагы олоххо киллэрэр туһунан толкуйдаабыттар. Ол төрүөтүнэн дьаҥсык кэмигэр дьон ордук чааһынай дьиэҕэ, сибиэһэй салгыҥҥа тардыһыыта буолбут. Инньэ гынан, аныгы үйэ ирдэбилинэн ураты быһыылаах, тупсаҕай көстүүлээх «сынньанар дьиэ» туттарга быһаарыммыттар.
«Барнхаус» диэн истииллээх, 6х6-лаах, икки мэндиэмэннээх, 70 кв м иэннээх дьиэни туттубуттар. Акылаата лафет маһынан оҥоһуллубут оттон эргиннэрэ – сип-панель, тас өттө – профилированнай лиис. Сыста турар эбии тутуутугар киирэн тахсар сир уонна хочуолунай бааллар.
Иван: Олорор дьиэбит өрөмүөнүн уонна мастарыскыайбытын бэйэбит туппут буоламмыт, бу дьиэбитин эмиэ бэйэ күүһүнэн тутарга быһаарыммыппыт. Дьиэ тээбиринин, тиэхиньикэтин кытта холбоон быһа холоон 3,5 мөл солк буолбута. Манна сирбит сыаната киирбэт.
Галина: Дьиэбит саамай тымныы ыйдарга олус сылаас турда, ханан да тымныы салгын курдары үрбэтэ. Билигин дьиэ иһэ +25, +27 кыраадыс сылаас. Оттон улахан түннүк дьоһун көстүүнү биэрэрин таһынан, күн сылааһын, сырдыгын киллэрэр. Оҥоһуута табыллыбыт буоллаҕына ханан да үрбэт, кырыарбат буолар эбит.
Иван: Сылытыытын, уутун-хаарын барытын бэйэбит киллэрбиппит. Матырыйаалыгар быһа холоон 200 тыһ солк барбыта.
Номнуо үһүс дьиэбитигэр «тёплый пол» диэн аатырар сылаас муостаны тэлгэттибит. Куйаар ситимигэр, «Ютуб» ханаалларыгар көрөммүт бастаан бэйэбит олорор дьиэбитигэр онтон мастарыскыайбытыгар тардыбыппыт.
Галина: Билигин тэлгэһэбитигэр мангаллаах ас астыыр сир уонна киирэн тахсар сир бааллар. Бырайыак быһыытынан эһиилгиттэн баанньык, чаан тутуохтаахпыт. Ону таһынан, оҕолорго аналлаах оонньуур былаһаакка, сынньанар сир тутар былааннаахпыт.
Бысыкатовтарга ыалдьыттаата Венера Охлопкова
