“Далбар Хотун” кулууп бүгүн түүнү хатайдаан таҥас оҥорорго маастар кылааһы тэрийдэ. Маастар кылааһы биһиги сурунаалбыт дьоруойа, быйыл маҥнайгы нүөмэрбитигэр тахсыбыт, олоххо көхтөөх, “киһи сатаабата диэн суох” диэн бириинсиптээх Мария Румянцева ыытта. Маастар кылааска кэлэн түүттэн хатайдаан таҥас оҥостубут ааҕааччыларбыт олус астыннылар.
“Мария киһи тута өйдөөн, оҥорон барарын курдук көрдөрөн, ыйан-кэрдэн, тэҥҥэ оҥорон биэрэрин олус сөбүлээтибит. Бүгүн сиспитигэр бэрт сылаас хаттык хатайдаан оҥордубут, уһуйааччыбыт наадалаах матырыйаалы аҕалан, хаттыкпытын өссө киэргэтэн биэрдибит. Бу курдук маастар кылааһы тэрийбит “Далбар Хотун” кулуупка махтанабыт”, — дииллэр Ньурбаттан кэлэ сылдьар Изабелла Андреева уонна Елена Филиппова.
Чурапчыттан сылдьар Галина Сивцева эмиэ олус астыммытын биллэрэр. “Бу курдук киһи саҥаҕа үөрэнэрэ олус үчүгэй. Соторутааҕыта эмиэ маастар кыласка сылдьан, сахалыы сон тиктэн кэттим,” – диэн кини мичээрдиир.
“Олус үчүгэй маастар кылааска сылдьан астынным ахан. Сиспэр бэртээхэй хаттык оҥоһуннум. Мантан иннэ түүнү хатайдыырга салгыы үөрэнэн, аны бэргэһэ оҥоруом этэ”, — диир өссө биир ааҕааччыбыт, Дьааҥы олохтооҕо Валентина Чирикова.
Саргылаана Соловьева Дьокуускай олохтооҕо, маннык маастар кылаастар буолалларын олус биһириирин биллэрэр. Эмиэ салгыы таҥаһы хатайдаан оҥорор санаалааҕын этэр.
Ким хайа иннинэ Дьокуускайтан сылдьар Павлина Никифорова хаттыгын оҥорон бүтэрдэ. Кини түүттэн хатайдаан оҥорору сатыыр эбит. Манна диэн Павлина үтүө санаатын, улахан сүрэҕин бэлиэтиир тоҕоостоох. Кини байыастарга анаан күннэтэ таҥас баайар эбит. Волонтердаабыта сылтан ордубут. Саллааттар ийэлэрин Мария Егоровна Емельянованы кытта былырыын Ростовка, Мариупольга тиийэ баран уолаттарга баһыылкалары тириэрдибиттэр, миэстэтигэр сылдьар байыастары кытта көрсүбүттэр. Билигин кини күн аайы үстүү-түөртүү наскыны баайан уолаттарга ыыта олорор. Бу курдук үтүө санаалаахтар биһиги ааҕааччыларбыт.
Күндү дьүөгэлэр! “Далбар Хотун” кулууп ыытар тэрээһиннэрин көтүтүмэҥ. Былааммыт өссө да киэҥ! Сурунаалгытын кытта мэлдьи бииргэ буолуҥ!
