Национальнай бибилэтиэкэ саалатыгар араас тэрээһиҥҥэ сырыттым ини, сылдьыбатым ини, ол гынан баран бүгүн Дапсы саҥа кинигэтэ сүрэхтэниитигэр курдук тоҕо анньан кэлбит элбэх киһини көрө илигим. Миэстэ тиийбэккэ, атын хостортон олоппостору киллэрдилэр. Хор, дьон ол курдук Дапсыларын ахтыбыттар. Норуот ааттаабытынан “саха тылын эмчитэ” Михаил Петрович Алексеев-Дапсы ытык сааһыгар тиийэн олорон, илиитин суруктан-бичиктэн араарбакка, үлэлии олороро хайҕаллаах да буоллаҕа.
“Сайдам” кинигэ кыһатыгар баара-суоҕа 500 ахсаанынан тахсыбыт “Сайар санаам, эмэр иэйиим” диэн кинигэтин саалаҕа олорон арыйталаан көрөн бараммын, ытыктыыр, тумус туттар киһибит Дапсы саха тылын хараанныыр туһугар кытаанах майгытын ыһыктыбакка, буоларын курдук, кырдьыгы эрэ өрө тутан суруйбут дии санаабытым. Манна суруллар кырдьыгы эдэр дьон ааҕара буоллар, “былыр саха эрдэхтэн” илдьэ кэлбит ийэбит тылыгар сыһыаннара уларыйыа, харыстыыр санаалара уһуктуо этэ. Ол эрээри, ол билигин кыаллар суол эрэ, суох… Саба быраҕан да соҕус буоллар, ыччат сахалыы аахпат буолла дииллэрин хатылаан туран, маныаха халыҥ кинигэнэн “куттаабакка”, Саха норуодунай суруйааччыта Сайа Дапсы үлэлэрин киэҥник тарҕатар сыалтан чөкө гына таһаартаан киэҥник тарҕатыахха сөп диэн этии киллэрбитин кытта сөпсөһөбүн.
Дапсы “Биһирэм тылын” билигин бары суохтуубут. Ол ыраата охсубут тоҕуһуонус сылларга кини тиһигин быспакка, ханнык да хахсаат тыалга бэриммэккэ, саха тылын ыраастык туттууга үөрэтэ-такайа сылдьыбыта кырдьыктаах суол буолан таҕыста эбээт! Ол буолар, Дапсы кыайыыта, саха дьонун ситиһиитэ. Уйбаан Самаайап Михаил Петрович Алексеев- Дапсы үлэлэрэ судаарыстыбаннай бириэмийэнэн наҕараадаланыахтаахтар диэн сиэрдээх этиитин мустубут дьон ытыс хабыллар тыаһынан өйөөтө.
“Саха аймах үйэлэр тухары үтүрүллэ, самнары баттана да сылдьан, тылын ыраастык туппута, тыл ууһун барытын баһылаабыта, сыыһырдыбатаҕа, олоҥхоҕо тиийэ улуу айымньылары айбыта биһиэхэ үрдүктэн үрдүк холобур буолуохтаах”,- диир Дапсы.
А.Никифорова-Шадрина, “Далбар Хотун” сурунаал.
