Сандал сааспыт чугаһаатар чугаһаан иһэр. Мантан инньэ өссө сылыйыа, халтараан бөҕө буолуо. Дьон илиитин-атаҕын тоһутуута бу кэмҥэ ордук элбиир. Манныкка түбэспэт туһугар бу судургу ырысыабы болҕойон аах уонна туһан.
Халадьыас киһи уҥуоҕун -иҥиэҕин бөҕөргөтөрүн билэр буолуохтааххыт. Онон эрэллээх ааҕааччыбыт минньигэс халадьыас ырысыабын үллэстэр.
— Мин халадьыаһы оҕо эрдэхпиттэн сиибин. Ийэбит куруук оҥорор буолара. Билигин бэйэм дьиэ кэргэммэр сотору-сотору астыыбын. Ырысыаба олус судургу, астыы үөрэннэххэ туохта да уустуга суох. Ол курдук, биир сүөһү туйаҕын уонна сибиинньэ тириитин бииргэ буһарабын. Толору соҕус уу кутан баран 7-8 чаас оргутабын. Бидиличчи оргуйбутун кэннэ чеснок, лавровай лиис, туус кутабын. Сөп буола-буола буккуйа сылдьабын. Онтон сиидэлээн баран кыра иһиттэргэ кутаталаан сойута түһэбин уонна халадьыынньыкка угаталыыбын. Чопчу бачча кутуллар эҥин диэн ырысыап суох, тус бэйэм харахпынан көрөн тууһун-туматын кутабын. Сүрүнэ диэн туйах муоҕа арахсыар диэри үчүгэйдик оргуйуохтаах.
Дөрүн-дөрүн халадьыас астаан бар дьоҥҥутун үөрдүҥ, кинилэр доруобуйаларын харыстааҥ.
#Далбар_Хотун_сандалыта
Венера Охлопкова
