«Далбар Хотун 2021» күрэс кыттыылааҕа, «Иэйии Хотун» номинация кыайыылааҕа Галина Шкулева бу күннэргэ Москубаҕа Михаил Ефимович Николаев аатынан «Бэс чагда» санаторийга, анал байыаннай дьайыы байыаһын Ийэтин быһыытынан сынньана-эмтэнэ сылдьар.
Кини Орто Халыма олохтооҕо, үс оҕо ийэтэ, быраас. Бу дьикти устуоруйалаах хаартысканы көрөҕүт. Манна Галина Ийэтин Анна Васильевна Винокурова мааны былаачыйатын кэтэн турар.
– Ийэм барахсан Москубаны көрүөн олус баҕарара, биһиги оҕо сырыттахпытына аҕабыт ийэбитигэр бэлэхтээбит былаачыйатын анаан-минээн Москубаҕа «дьаарбата» аҕаллым, — диир.
Винокуровтар Орто Халыма Өлөөкө күөлүн олохтоохторо, 7 оҕолоохтор, онтон биэһэ — кыыс. Галина аҕас балыһа Анна Винокурова – Үрүҥ Көтөр Ийэтигэр анаабыт олус истиҥ хоһоонун таһаарабыт.
ХХХХХ
Ийэм кэппит былааччыйалара
Итии салгынынан илгийэллэр,
Иллээх дьиэ иһирэх сыһыанынан
Ис сүрэхпэр ыраах сөҥпүт
Истиҥ санааларбын таарыйаллар.
Онно ийэм өссө тыыннаах,
Олох,үлэ оргуйар үөһүгэр эргийэрэ,
Сылга биирдэ оһуобай түгэҥҥэ
Ууруллан турар мааны былааччыйатын кэтэрэ.
Оччоҕо тула эйгэм
Дьиктитик да уларыйара,
Күн ахсын көрер дьиэм
Сырдаан-сырдаан
Иһиллибэт музыканан туолара.
Дууһам кынаттаах кыракый куорсунугар
Күн араас өҥнөрүн түһэрэн,
Дьоллоох оҕо саас
Чуораана чугдаарара.
Ийэм үөрбүт харахтарынан
Таптыы, таптыы көрөрө…
Хатыламмат оҕо сааспын санатар
Хаарыаннаах урукку былааччыйалартан
Өссө да илгийэр Ийэм
Биһиэхэ таптала,
Кэрэни сэргиир уйан-нарын дууһата.
