Дора Жиркова, Анастасия Данилова, Александра Овчинникова, Софья Сидорова уонна да атын салайааччы дьахталлар сырдык ааттара бу бүгүн буолбут улахан тэрээһиҥҥэ үгүстүк ааттанна. Тоҕо диэтэххэ кинилэр өрөспүүбүлүкэ сайдарыгар улахан кылааты киллэрбит дьахталларынан буолаллар.
Саха сирин үлэһит дьахталларын бастакы сийиэһэ буолбута 100 сылыгар уонна Улуу Кыайыы 80 сылыгар анаммыт Саха сирин парламентарий дьахталларын киэҥ ыҥырыылаах мунньаҕа, бүгүн, кулун тутар 5 күнүгэр буолла.
Өрөспүүбүлүкэ араас улуустарыттан уонна Дьокуускай куораттан уопсайа 70 тахса актыбыыс дьахталлар кытыннылар.
Дьиэ кэргэн бигэ туруктаах буолуутун, демография балаһыанньатын, анал байыаннай дьайыыга сылдьар байыастары уонна кинилэр дьиэ кэргэннэрин өйөөһүн, экология боппуруостарын тула кэпсэтии барда.
Мунньаҕы Ил Түмэн Наукаҕа уонна үөрэххэ сис кэмитиэтин бэрэссэдээтэлэ Антонина Григорьева арыйда.
«Саха сирин үлэһит дьахталларын бастакы сийиэһиттэн 100 сыл ааста. Сийиэс дэлэгээттэрин истэригэр Платон Ойуунускай ийэтэ Евдокия Ивановна Слепцова, Александра Овчинникова ийэтэ Мария Андреевна Яковлева, академик Мария Гаврилова ийэтэ Мария Федоровна Охлопкова бааллара. Биллэн турар, Саха сирин үлэһит дьахталларын бастакы сийиэһэ дьахталлар өрөспүүбүлүкэ уопсастыбаннай олоҕор ураты миэстэ ылаллаларыгар олук буолбута», – диэн Антонина Афанасьевна эттэ.
Тэрээһиҥҥэ Саха сиригэр дьахталлар хамсааһыннарын сайдыытын устуоруйата үгүстүк кэпсэннэ.
Ол сылларга Саха сирин үлэһит дьахталларын бастакы сийиэһин көҕүлээччилэринэн Саха АССР тумус дьоно Платон Алексеевич Ойуунускай, Иван Николаевич Винокуров, Степан Максимович Аржаков уонна да атыттар этилэр.
«1925 сыл кулун тутар 16-17 күннэригэр буолбут Саха сирин үлэһит дьахталларын бастакы сийиэһин 86 дэлигээттэриттэн 59 хара үлэһиттэр этилэр, оттон 36 дьахтара сатаан аахпаттара уонна суруксуттаабаттара. Ол да буоллар сырдыкка-кэрэҕэ, билиигэ-үөрэххэ тардыһыылара күүстээх буолан, кинилэр саҥа олоҕу тутарга дьулуспуттара уонна онно ситиһиилэммиттэрэ. Сийиэс кэннэ дьахтар хамсааһына сайдарыгар улахан үлэ ыытыллыбыта. Баартыйа үлэһиттэригэр дьахтар гимназиятын бүтэрбит кыргыттары бэлэмнээбиттэрэ. Кинилэр ааттара киэҥник биллэр – Вера Синеглазова, Дора Жиркова, Раиса Цугель, Марфа Потапова уонна да атыттар. Кинилэр Саха сиригэр дьахталлар хамсааһыннара сайдарыгар улахан төһүү күүс буолбуттара», – диэн СӨ дьахталларын хамсааһынын сойууһун бэрэссэдээтэлэ Анжелика Андреева эттэ.
Василий Кононов хаартыскаҕа түһэриитэ.
