Билигин кус кэмэ. Куһу бултуур албас элбэх. Былыр сахалар кустуур албаһы баһылыыллара. Олортон биирдэстэрэ — оҕуһунан үөмүү. Ол туһуттан оҕустарын үргүбэт, истигэн гына үөрэтэллэрэ. И. А. Худяков суруйарынан, куска үөмэргэ анаан үөрэппит оҕустарын, кус түспүт күөлүн кытыытыгар тиийэн, ыытан кэбиһэллэр. Оҕус, ол-бу диэки олоотоон баран, кустары булан көрөр уонна ол диэки хаамар. Ол баран иһэн, кыл түгэнэ тохтоон, илин атаҕынан сири хаһар, от сиэбитэ буолар. Ити кэмҥэ кусчут үөмэн кэлэн оҕус күлүгэр сөрөнөр. Оҕус салҕыы хаамар. 25-30 саһаан хаалбытын кэннэ тохтоон, турунан кэбиһэр. Оччоҕо, иччитэ саатын оҕус үрдүгэр уурар уонна билбэккэ аһыы сылдьыбыт кустары хоһулаан ытар. Инник албаһынан куһу-хааһы кыайаллар эбит.
