Сахалар оҕоҕо өлүүлээх буолан араас харысхаллары тутталлара. Оҕо биһигэр абааһыттан, хараҥа тыыннартан көмүскүүр дөлүһүөн угун, анал күлү буккуйар күлүкэни ыйыыллара. Биһик уот диэки өттүгэр: уол оҕоҕо удьурхай уктаах быһыччаны, кыыс оҕоҕо кыптыыйы угаллара. Үрдүгэр араас харысхаллары, ымыылары, эмэгэттэри ыйыыллара: кыыннаах быһах, чокуурдаах хатат, мас сүгэ, ох оноҕоһо, алтан чуораан, мэкчиргэ баһа эбэтэр мохсоҕол тыҥырахтаах атаҕа, эһэ баппаҕайа, сүөһү үрүллүбүт хабаҕа о.д.а. Ардыгар оҕо сытар сирин улаҕатыгар «чуолҕан» диэн анаан уһаарыллыбыт уһун ньолбуһах, хайаҕастардаах, хаптаҕай тимири кистииллэрэ. Ол «чуолҕан» оҕону оһолтон-моһолтон араҥаччылыыр. XVIII үйэҕэ сахалар олорор буолбут оҕо тас таҥаһыгар үс чуолҕаннаах хайаан да үрүҥ алтантан (медь) кутуллубут киэргэл харысхалы тигэллэрэ. Харысхал ортотугар кэлин атаҕар турар хахайы ойоҕос өттүттэн ойуулууллара. Хахай баһа утары хайыспыт буолар. Маннык киэргэли оҕо 7 сааһыгар диэри иилинэр.
Сайпыт: dalbar.ru
Телеграм: https://t.me/dalbarxotyn
