“Этно-Эрато” Евразия норуоттарын национальнай таҥастарын үрдүк муодата XXII төгүлүн Москва куоракка ыытылынна. Күрэххэ Арассыыйа 20 регионнарыттан уонна 7 тас дойдуттан кыттыыны ыллылар. Түмүктүүр дьоро күн сэтинньи 25 күнүгэр буолан ааста. Күрэххэ 110 кэллиэксийэ көрүлүбүтүттэн, Саха сириттэн 9 араас кэллиэксийэ киирдэ. Бу көрүүгэ “Үрдэл”, “Сөргүтүү”, “Сириктэ”, аҕыйах ахсааннаах хотугу норуоттар иистэнньэҥнэрин түмсүүлэрэ кыттыыны ыллылар.
“Этнические мотивы в современном костюме” номинацияҕа бастакы миэстэни “Деловые образы с якутским орнаментом: офисный стиль” диэн Л.П. Жиркова салайааччылаах “Үктэл” айар түмсүү ылла. Ону таһынан, “Лучший костюм народов Севера, Сибири, Дальнего Востока” диэн номинацияҕа эмиэ бастаатылар. “Традиционные зимние шубы — Бууктаах сон” диэн кэллиэксийэлэрэ уһулуччу буолла.
Хоту дойдуга анаммыт номинацияларга иккис миэстэҕэ “Сириктэ” уонна А.Е. Куличкина салайааччылаах норуот маастардарын түмсүүлэрэ таҕыстылар. “Лучший этнически-сценический костюм в действии” диэн номинацияҕа иккис миэстэни Дьокуускайтан Надежда Софронова “Зов предков” диэн кэллиэксийэтинэн кыттан ылла.
“Этнические мотивы в современном костюме” диэн номинацияҕа А.Ф. Харлампьева салайааччылаах “Сөргүтүү” түмсүү “Божества и духи якутской мифологии” кэллиэксийэтэ үһүс миэстэ буолла. Бары кыттааччылары, кыайыылаахтары ситиһиилэринэн эҕэрдэлиибит. Өссө да ситиһиилэр кэлэ турдуннар.
