Бүгүн, Саха Республикатын норуодунай суруйааччытын Семен Андреевич ПОПОВ — Сэмэн Тумат 80 сааһын туолбут үбүлүөйүн бэлиэтиир ытык күммүт. 80 саас улахан саас. Ол эрээри Семен Андреевич курдук күннэтэ норуотум, дьонум-сэргэм туһа диэн түбүгүрэ сырыттахха, бу сыллар биллибэккэ ааһаллар. Сэмэн Тумат баай ис хоһоонноох олоҕу олордо. Кини төрөппүттэрэ Чурапчы көһөрүүтүн дьоно. Улуу сэрии сылларыгар Булуҥ улууһугар тиийэн 1944 сыллаахха олунньу 23 күнүгэр Сэмэнчиги төрөппүттэр. Кэлин, биһиги тапталлаах суруйааччыбыт Сэмэн Тумат муора арыытыгар ааспыт оҕо сааһын эмиэ да астына, эмиэ да сонньуйа бэйэтин ураты тыыннаах айымньыларыгар сиһилии кэпсээбитэ. Көһөрүү ыар тыына Арктика ураты эйгэтин арыйбыт суруйааччыбытын тыйыс айылҕатынан тургутан ииппитин «Муора арыытыгар олох», «Туундара оһоҕо», «Улуу кыыл тыына», «Тоотук муоратааҕы сырыылара», «Дорообо Арктика», «Оҕо сааһым хоптото», «Хотугу дойду хонноҕуттан», «Таба саха сиригэр хайдах кэлбитэй?» айымньыларыгар билсэн сөҕөбүт.
