Ахсынньы 14 күнүгэр Уус-Алдан улууһун Найахытыгар, «Симэх» түмсүү (салайааччы Гоголева Х.И.) тэриллибитэ 10 сылын бэлиэтээһин үрдүк таһымҥа буолан ааста. Түмсүү кыттыылаахтара өбүгэ үгэһин тутуһан дьаныардаахтык дьарыктаммыт үлэлэрин бар дьон көрүүтүгэр таһаардылар. Ол курдук, кыл, оҕуруо, туос, кыбытык, тимир о.д.а. оҥоһуктар дьон болҕомтотун ылыан ыллылар. Кэлбит ыалдьыттар быыстапканы астына, дуоһуйа көрдүлэр.
Ону таһынан, үбүлүөйгэ анаан тахсыбыт альбом-сурунаалы Чукрова Г. А. билиһиннэрдэ. Түмсүүгэ уопсайа 11 норуот маастара, олор иһигэр СӨ норуотун маастардара Гоголева Х.И, Пестерева М.А., Федорова М.И. бааллар. Кинилэр оҥоһуктара өрөспүүбүлүкэҕэ эрэ буолбакка, дойду атын куораттарыгар араас куонкурустарга кыттан бириистээх миэстэлэри ылбыттара. Быйыл “Саха” НКИХ “Саха сатаабатаҕа суох” биэриигэ кыттан маастар-кылаастары көрдөрбүттэрин үгүс дьон сэҥээрбит. Ону таһынан, сыллата ыыталлар Олоҥхо ыһыаҕар кыттан миэстэлэһэллэр. Салайааччы Гоголева Х.И. түмсүү кыргыттарыгар иис кистэлэҥнэригэр үөрэтэр, сүбэ-ама биэрэр. Оттон Чукрова Г.А. түмсүү үлэтин-хамнаһын түмэн сурукка тиһэн иһэр. Онон бэйэ-бэйэлэрин ситэрсэн биэрэллэр. Бу тэрээһин үөрүүлээх чааһыгар олохтоох салалта, куораттан кэлбит биир дойдулаахтара,»Үктэл» этно-общественнай түмсүү салайааччыта Жиркова Л. П., дьокутааттар, тэрилтэ салайааччылара, МЧС-тар, «Алгыс» бэтэрээннэр сэбиэтин салайааччы Петрова С. Е., ону таһынан улуустааҕы култуура салалтатын аатыттан Герасимова М. Н., “Удьуор утум” аатыттан Петрова М. Е., “Үһүс саас” оскуолаттан Готовцева М.Г. наҕараадалары туттардылар.
Тумсүү кыттыылаахтара бэйэлэрэ оҥорбут оҥоһуктарын, тикпит таҥастарын кэтэн хааман көрдөрдүлэр. Ол курдук, саха төрүт таҥаһын, кыл, сиэл оҥоһуктарын, чаппараахтарын, сахалыы соннорун о.д.а. көрдөрөн бырааһынньыгы ситэрэн-хоторон биэрдилэр. Ону тэҥэ «Үктэл” түмсүү өбүгэ үгэһин тутуһан тикпит сахалыы таҥастарын кэтэн көрдөрдүлэр. Саха дьахталларын талба талааннара барыбытын сөхтөрдө.
Ханнык баҕарар түмсүү олохтоох салалта өттүттэн өйөбүллээх, тирэхтээх буоллаҕына, уон сыл иһигэр үгүс нэһилиэктэри, улуустары кэрийэн ааттарын ааттаталлара бу тэрээһиҥҥэ арылхайдык көһүннэ. Ол курдук, урукку сылларга үлэлээбит баһылыкка П.С. Сивцевкэ, улуус дьокутаатыгар П.И. Бурнашевка, билигин үлэлии сылдьар баһылыкка П.А. Слепцовка уонна бары тэрилтэлэр салайааччыларыгар барҕа махталларын тиэртилэр. “Симэх” түмсүү өбүгэ үгэһин салгыыр, мындыр өйүн утумнуур дьоннооҕуттан киэн туттабыт. Айбыт-туппут үлэҕит аар саарга аатырдын, көлүөнэ ситимэ быстыбатын, кэккэҕит кэҥээтин, ыра санааҕыт сайыннын, дьаныардаахтык үлэлээҥ, үйэлээҕи үксэтиҥ диэммин баҕа санаабын тиэрдэбин.
Уус-Алдан улууһун настаабынньыктарын сүбэтин салайааччы Н.Г. Говорова.
