Айталина НИКИФОРОВА-ШАДРИНА суруналыыс, прозаик, Саха Сирин суруналыыстарын, СӨ суруйааччыларын Сойууһун чилиэнэ.
Айар үлэтин 1989 сылтан “Эдэр коммунист” (“Сахаада”) хаһыаттан саҕалаабыта. 1993 сылтан “Саха сирэ” хаһыакка социальнай политикаҕа салаатыгар сэбиэдиссэйинэн үлэлээбитэ. Саха сирин сүрүн хаһыатыгар уон алта сыл айымньылаахтык, таһаарыылаахтык үлэлээбит сылларын олус күндүтүк саныыр. Хаһыат кылаабынай эрэдээктэрэ Василий Васильевич Кириллин улахан эппиэтинэһи сүктэрэн, хаһыат халыҥ нүөмэрин эрэдэктээринэн анаабыта. Ол курдук оччолорго, 1996 с., “Саха сиригэр” аан бастакынан олох бары эйгэтин хабан сырдатар, “сыта-тура” ааҕыллар халыҥ хаһыат тахсыбыта. Биэс сыл эрэдээктэринэн үлэлээн баран, маҥнайгы бэрэсидьиэммит Михаил Ефимович Николаев дьиэ кэргэн экономикатын олоххо киллэрэн барбытыгар бу тиэмэни киэҥник сырдатар наада буолан, “Саха ыала” диэн сыһыарыы кэнсиэпсийэтин суруйан, көмүскээн, таһааран барбыта. “Саха ыала” дьиэ кэргэн олоҕун бүтүннүү сырдатар хаһыат дьон сэҥээриитин ылбыта.
“Саха сирэ” хаһыакка үлэлиир кэмигэр, Наталья Ивановна Харлампьева 1994 с. “Далбар Хотун” диэн дьахтар аймах сурунаалын тэрийбитигэр хаһыакка үлэлии сылдьан, биир идэлээхтэрин кытта саҥа сүүрээҥҥэ киирэн, айбыттара-туппуттара. Айталина Никифорова өр сылга сурунаал редколлегиятын чилиэнэ этэ.
Кэнники сылларга СӨ Наукаҕа уонна профессиональнай үөрэхтээһиҥҥэ министерствотыгар, “Сахатранснефтегаз” ААуо, НХЗ ГРУПП пресс-сулууспаларын салайбыта. Быйыл “Ил Түмэн” хаһыакка эрэдээктэринэн үлэлии сылдьан, “Далбар Хотун” сурунаал сүрүн эрэдээктэринэн ананна.
СӨ Бэчээтин туйгуна, суруналыыстар куонкурустарын хас да төгүллээх кыайыылааҕа, ол иһигэр икки төгүл “Кыһыл көмүс бөрүө” лауреата. Айталина Никифорова аата 2006 с. Россия суруналыыстарын Кыһыл көмүс пуондатыгар киирбитэ. СӨ суруналыыстыкатыгар кылаатын иһин бэлиэлээх. СӨ Правительствотын, Ил Түмэн Бочуоттаах грамоталарынан наҕараадаламмыта. “Айар” ( “Бичик”) кинигэ кыһатыгар уус-уран суруйуута 2006 сылтан бэчээттэнэр. Аҕыс кинигэ ааптара.
