Олох хаамыытынан сайдыы тэтимирэр. Күннээҕи олохпутугар билэр-көрөр, туһанар ньымаларбыт үксүн сыыппараҕа көһөллөр. Ол сайдыы ордук кумааҕынан бэчээт таһаарыыларга дьайар. Бүгүн, олунньу 12 күнүгэр, Ийэ тыл, сурук-бичик күнүн иннинэ, сахалыы тыллаах биэриилэр уонна бэчээт таһаарыылара төрөөбүт тылы харыстааһыҥҥа уонна сайыннарыыга оруолларын туһунан Ил Түмэҥҥэ кэпсэттилэр.
«Төгүрүк остуолга» норуот дьокутааттара, бэчээт үлэһиттэрэ уонна тыл боппуруостарыгар учуонайдар кытыннылар.
«Биһиги өрөспүүбүлүкэбитигэр СМИ сыыпараҕа ситиһиилээхтик көһөр уонна сайдыы тэтимин кытта тэҥҥэ хаамсар. Ол эрээри, култуурабытын уонна төрүт тылбытын харыстаан илдьэ сылдьар уонна сайыннарар туһуттан кумааҕы бэчээт таһаарыылары уонна сахалыы тыллаах биэриилэри симэлитиэ суохтаахпытын өйдүүбүт», – диэн төгүрүк остуолу салайан ыыппыт Ил Түмэн култуураҕа уонна маассабай информация сириэстибэлэригэр сис кэмитиэт бэрэссэдээтэлэ Виктор Губарев эттэ.
«Сахабэчээт» генеральнай дириэктэрэ Ньургуйаана Стручкова бэчээт таһаарыылара ханнык да үйэ кэлбитинин иһин бэйэтин суолтатын сүтэриэ суохтарын бэлиэтээтэ.
«Саха дойдута» бастакы сахалыы тыллаах хаһыат тахсыаҕыттан саха тылын харыстыыр уонна сайыннарар соругу туруорбута күн бүгүҥҥэ диэри сүрүн сорукпут буолар. Төрөөбүт тылбыт тыыннааҕын, сайдарын, дьайарын тухары норуот быһыытынан тыыннаах буолуохпут, омук быһыытынан уратыбыт, култуурабыт, искусствобыт, литературабыт кэскиллээхтик сайда туруо. Ол туһугар күннэтэ тылы сөптөөхтүк, таба туттан дьоммутун кырдьыгы тутуһар, үтүөҕэ, үрдүккэ кынаттыыр суруйуулары тиэрдэр ытык соруктаах саха бэчээтин сайыннарыахтаахпыт.
Билигин аан дойду үрдүнэн киһи-аймах сүҥкэн улахан процесска сылдьар – сыыппараҕа көһөр быыһык кэмэ. Ити сүҥкэн хамсааһыҥҥа мэлиллэн, урут илиибитигэр бэриллэр хамнаспыт, кумааҕы харчыбыт электроннай каартаҕа көспүтүн курдук, хаһыат суох буолар кэмэ хаһан эрэ эмиэ кэлиэҕэ. Ол быыһык кэм төһө кээмэйдээх буолара аан дойдуга бара турар хамсааһыннары кытта ситимнээх. Кумааҕы хаһыаттар симэлийэн сүтүүлэрин кытта тыл быһаччы ситимнээх буолан, тылбыт сүтүөн сөп. Онон кумааҕы хаһыаттары сүтэрии быһах биитинэн хаампыкка тэҥнээх, кутталлаах. Сыыппараҕа көһүү киһи-аймахха, ордук аҕыйах ахсааннаах дьоҕус норуоттарга охсуулааҕа чахчы. Билигин судаарыстыбабыт, өрөспүүбүлүкэбит үрдүкү салалтата, Ил Дархаммыт тылы харыстааһын политикатын ыытар буоланнар, тыл эйгэтин тутууга хаһыаттар, сурунааллар тахсаллар, ааҕааччыга тиийэллэр», – диэтэ кини.
Санатар буоллахха, «Сахабэчээт» судаарыстыбаннай автономнай тэрилтэ Сахабыт сирин улуустарын отут тоҕус хаһыатын уонна өрөспүүбүлүкэбит «Далбар Хотун», «Чолбон», «Полярная звезда», «Байанай» сурунаалларын, “Забота-Арчы”, “Илкэн” хаһыаттарын таһаарар бөдөҥ медиахампаанньа буолар. Маны таһынан куйаар ситимигэр таһаарыылара: «Улус Медиа» – медиахампаанньа өрөспүүбүлүкэҕэ инникилээн иһэр интернет-платформа, улуус хаһыаттарын 34 социальнай ситим таһаарыылара.
Төгүрүк остуолга бэчээт таһаарыылара төрүт тылы харыстааһыҥҥа уонна сайыннарыыга оруолларын туһунан «Саха» НКИХ генеральнай дириэктэрэ Олег Марков, «Сахамедиа» АО генеральнай дириэктэрин солбуйааччы Чокуур Гаврильев, «Кэскил» оҕо бэчээтин кыһатын дириэктэрэ Ольга Семенова, «Илкэн» хаһыат эрэдээктэрэ Андрей Исаков санааларын эттилэр.
Төгүрүк остуолга киирбит этиилэринэн «2025-2030 сылларга судаарыстыбаннай уонна официальнай тыллары харыстааһыҥҥа уонна сайыннарыыга» судаарыстыбаннай бырагыраама оҥорууга кэккэ боппуруостары учуоттуулларын эттилэр. Ол курдук, судаарыстыбаннай былаас уорганнара тус саайтарыгар сахалыы иһитиннэриилэри эмиэ туруолалларыгар, муниципальнай былаас олохтоох СМИ тэрилтэлэрин кытта ыкса сибээстэһэллэрин, өрөспүүбүлүкэ уонна оройуоннарга тахсар бэчээт таһаарыыларын субсидиятын улаатынарарга, төрүт тыллары сайыннарарга туһуламмыт бырайыактары өйүүргэ, сахалы ытыллаах биэриилэри үбүлээһини улаатыннарарга уонна дьон суруттарбыт бэчээт таһаарыылара кэмигэр аадырыска тиийэрин ситиһэр туһуттан «Арассыыйа пуочтата» үлэтин көрөргө.
