1996 сыллаахха биһиги бастакы президеммит Михаил Ефимович Николаев уурааҕынан олунньу 13 күнэ Төрөөбүт тыл уонна сурук-бичик күнүнэн биллэриллибитэ. Бу ытык күн саха бастакы лингвист учуонайын, киэҥ эйгэҕэ туттуллар суругу-бичиги төрүттээбит Семен Новгородов аатын кытары ыкса ситимнээх. Саха бастакы алпаабытын оҥорбут Семен Андреевич бу күн төрөөбүтэ. Сибиир кырдьаҕас омугар сахаҕа сурук-бичик былыр былыргаттан баара сабаҕаланар. Ол курдук биһиги Ытык Чыыбыстаан Куо диэн арҕаа халлаан алын кырыытыгар көтө сылдьар тыл таҥаралаахпыт. Онтон олоҥхоҕо сурулларынан соҕуруу халлаан үрдүк таһаатыгар олорор дьылҕабыт айыыта Дьылҕа Тойон киһи олоҕун төрүөн инниттэн дьаҕыл таас остоолбоҕо хотой хаанынан суруттаран кэбиһэр. Кини суруксута, саха айыыларыттан бастакы үөрэхтээх Уһун Уот Дьурантаайы суруксут диэн буолар. Кини Дьылҕа Хаан ыйааҕын суор куорсунунан дьылҕа тааһыгар суруйан кэбиһэр соруктаах. Ол иһин саха суругун-бичигин айыыта Уһун Уот Дьурантаайы суруксутунан ааҕыллара.
