Эдэр ыал Күбэйэ уонна Дьулус Егоровтар сынньанар дьиэлэрин көрдөрөбүт. Бу ураты тутуулаах дьоҕус дьиэни ааспыт сыл күһүнүгэр туттан саҕалаабыттар уонна бу саас улэҕэ киллэрбиттэр. Бырайыагын хаһаайын бэйэтэ толкуйдаабыт, оттон ис бараанын иккиэн көмөлөөн оҥорбуттар. ”Чопчу биир истиили тутуспатахпыт, интэриниэттэн көрөн иэйии ылан, сороҕун бэйэбит айан таһаарбыппыт. Иккиэн “перфекционист” соҕус буоламмыт, матырыйаалы, кыраасканы, миэбэли талыыга балачча өр бириэмэни ыыппыппыт. Тутуутун эмиэ муҥутуур үчүгэйгэ тиэрдэ сатаан, хара маҥнайгыттан киириэхтээх күммүтүгэр баттасбатахпыт”, – диэн дьиэлээхтэр кэпсииллэр.
Дьиэ эркинэ, үрдэ, анна барыта сип-панель матырыйаалынан тутуллубут. Тас өттүн, кырыыһатын профлииһинэн бүрүйбүттэр, иһин гипсокартонунан уонна декоративнай сыбаҕынан оҥорбуттар. Уопсай иэнэ 84 кв м, үрдүгэ 5,5 м. Бастакы этээскэ тастан киириигэ аан хос, бииргэ холбоммут куукуна, саала уонна санузел, техническэй хос баар. Оттон иккис этээскэ икки утуйар хостоох. Толору хааччыллыылаах буолан кыстыахха сөп.
Биир эркин үс улахан туннуктээх, утуйар хосторго биирдии уонна бастакы этээскэ баар хостор кыра түннүктээхтэр. Ону таһынан, 8 кв м иэннээх болкуоннаах. Ону кэлин бүтүннүү ититэр былааннаахтар. Уотунан барар оһоҕунан этэҥҥэ кыстыгы туораабыт.
Түмүккэ хаһаайыттар сүбэлииллэр: ”Дьиэ туттуута элбэх үбү ирдиир, онно бэлэм буолуохха наада эбит. Ол иһин, көнө, кураанах сири ыла сатааҥ. Атын дьон дьиэтин үтүгүннэрбэккэ бэйэҕит ыра санааҕытынан, хайдаҕы баҕараргытынан туттуҥ диэммит сүбэлиибит. Онтон киһи ордук астынар, дуоһуйар эбит”.
Венера Охлопкова