Бүгүн, олунньу 12 күнүгэр тымныы оҕуһун биир муоһа тоһунна. Сахалар тымныыны тоҕо оҕуһунан сирэйдээбиттэрэ буолла? Бука, былыр, сэлии кыылын муоһун уонна бүтүн өлүгүн ирбэт тоҥҥо, уолбут күөл оннуларыгар булалларын кытары ситимнээн эрдэхтэрэ. Мааман кыылы «уу оҕуһа» диэн ааттыыллара. Тымныы оҕуһа аллара абааһы дойдутуттан тахсар, Хотугу Муустаах муораттан кэлэр.
Сэтинньи 8 күнүгэр Тымныы оҕуһун бастакы муоһа үүнэн, кыһыҥҥы күннэр саҕаланаллар.
Сэтинньи 21 күнүгэр ол муос кылааннанар, тымныы күүһүрэн барар.
Ахсынньы 21 күнүгэр иккис муоһа үүнэн, дьыбар уоҕурар.
Тохсунньу 8 күнүгэр иккис муос кылааннанар (сытыыланан), Кириһиэнньэ дьыбара түһэр.
Тохсунньу 31 күнүгэр соҕуруу халлаан оҕото Хотой кыыл кэлэн уйатын хаардыыр. Кини чанырҕыырыттан тымныы оҕуһа чаҕыйар, муоһун кылаана кыларыйар (сыппыыр). Дьыбар арыый аҕырымныыр.
Дьэ уонна олунньу 12 күнүгэр бастакы муос тостор. Аны, олунньу 24 күнүгэр иккис муос тостон, тымныыбыт тыына тахсыаҕа, сылааспыт чугаһыа.
Уруһуй Интэриниэттэн ылылынна
