Тохсунньу 27 күнүгэр «Саха» НКИХ ханаалыгар «Уот Дьулустаан» диэн Валентина Гаврильева сэһэнигэр олоҕуран уһуллубут саҥа сэрийээл көстөн саҕаланна. Сценарийын Катерина Григорьева-Кэрэмэс Сыдьаай суруйбут, режиссер Елена Эверстова.
«Уот Дьулустаан» киэһээҥҥи ас кэнниттэн күөх экраҥҥа дьону түмэр умсугутуулаах киинэнэн буолла. «Далбар Хотун» сурунаал дьон санаатын иһиттэ.
Надежда Егорова-Намылы, суруналыыс:
– Сэрийээл саҥа саҕаланна эрээри, хайыы үйэ көрөөччүнү умсугутан эрэр. Сэрийээлгэ оруолга олус бэркэ оонньуулларын көрөн (идэлээх артыыс аҕыйах), “саха сатаабата суох” диэн этии манна да сыһыаннааҕын көрөҕүн. Тылларыгар-өстөрүгэр кыра алҕастары, ардыгар хоһоон курдук ааҕалларын аахсыбатахха, бэркэ оонньууллар. Ордук ити Ылдьаана хотуну оонньооччу артыыска киһи болҕомтотун тардар.
Урукку испэктээктэргэ, киинэлэргэ дьадаҥы, былыргы олох буолла да, сирэй-харах, дьүһүн-бодо, таҥас-сап дьаабы буолааччы (ама да аас-туор былыргы олоҕун иһин). Оттон билигин дьиэлэрэ-уоттара, иһиттэрэ-хомуостара, таҥастара-саптара уурбут-туппут курдук, ырааһа көрөргө олус үчүгэй.
Мин сэрийээли устубуттарга ураты махтаныахпын баҕарабын. Тоҕо диэтэххэ, кинилэр саха суруйааччы дьахтара Валентина Гаврильева айымньытыгар иккис тыыны биэрдилэр. Чуолаан сэбиэскэй кэм суруйааччытын айар үлэтигэр төннүбүттэрэ махталлаах дьыала. Маладьыастар!
Александра Тимофеева, бибилэтиэкэр:
– Олохтоох ханаалга саҥа саҕаламмыт «Уот Дьулустаан” киинэни дьон киэһэ аайы күүтэн, умсугуйан көрөн эрэллэр. Биһиги, саастаах дьон, бэйэбит кэммитигэр аахпыт суруйааччыбыт Валентина Гаврильева сэһэнигэр олоҕуран, сценарий суруйан оҥорбуттар. Саха сирин элбэх тыйаатырдарыттан артыыстар уһулуннулар диэбиттэрэ. Кырдьык, олус да итэҕэтиилээхтик оонньууллар. Былыргы саха олоҕун дьиҥнээҕин көрдөрөр мал сал, алаас, айылҕа көстүүтэ саха куттааҕы умсугутар даҕаны! Артыыстар оччотооҕу саха дьахталларын эрэйдээх буруйдаах олохторун, ытыыр-ыллыыр бэйэлэрин киһини долгутардык оонньууллар. Сценарист Кэрэмэс Сыдьаай дьахталлартан биир бастакы прозаик суруйааччы Валентина Гаврильева айымньытынан сериал оҥорон киэҥ эйгэҕэ таһаарбыта, айымньыны саҥалыы тыыннаабыта хайҕаллаах. Айымньыны урут аахпыт да буоллахпытына, умнуу тэмнии ханна барыай, онон мантан кэлэр киэһэлэргэ Ырыачайбыт дьылҕатынан олоруох курдукпут.
Валентина, медсиэстэрэ:
– Мин ордук хотун дьахтар Ылдьаанаттан кыһыйабын. Ыалдьабын диир да наһаа сэниэлээх. Быһыыта-таһаата куһаҕанын эчи. Ол эрээри, ити дьоруой миигин инник кыыһырдар буоллаҕына, артыыс, кырдьык итэҕэтиилээхтик оонньуур эбит. Оттон Ырыачайы аһыммытым иһит туох кэлиэй?! Бу орто туруу бараан дойдуга туох буолбатаҕа баарай?! Онон сүрүн дьоруой Ньукуу мүччүргэннээх сырыыларын кэтэһэбит.
Вилена, устудьуонка:
– Бу иннинэ сахалыы сэрийээллэргэ хараҕым хатанааччыта суох. «Уот Дьулустаан» сэрийээли ийэм көрө олордоҕуна, тохтоон аттыгар туран көрсүбүтүм. Былыргыны көрдөрөр олох-дьаһах болҕомтобун тута тарпыта. Онтон биирдэ өйдөөбүтүм, киинэни биир тыынынан көрөн кэбиспит эбиппин! Ордук артыыстар оонньуулара, тыллара-өстөрө, сэрийээл сценарийа астыннарда. Хотун хаан дьахтар Ылдьаана, Аҥар Харах уонна хамначчытара Хобороос оонньууларын наһаа сөбүлээтим. Ылдьаанаттан эмиэ да күлэбин, эмиэ да сонньуйабын. Кырдьык, былыр хамначчыттаах баайдарга итинник көстүү баар бөҕө буоллаҕа.