- Эн аттыгар кэргэниҥ, оҕолоруҥ, дьонуҥ дьоло суох буоллахтарына, ол аата эн эр киһи аналын толоро илик эбиккин. Мандар Уус
- Эр киһиэхэ дьахтар хайдах сыһыаннаһар да, хардата оннук буолар. Эр киһи дьахтары харыстыахтаах, дьиэ иһин кини тутан олорор.
- Эр киһини атын эр киһиэхэ тэҥнээбэт куолу. Ханнык баҕарар ыал аҕата бэйэтэ туспа кэрэ, бэйэтэ туспа кыахтаах.
- Дьиэ иһигэр эр киһи баар буоллаҕына — дьиэ иһэ сылаас, эркин бүтэй, эр киһи — туллар тутаах, иэгэйэр иэччэх, өһүө уонна акылаат диэн буолуохтаах. Аҕа баһылыкка оннук сыһыан, эрэмньи, тулааһын курдук көрүү баар буолуохтаах.
- Билиҥҥи эр киһи, дьиэ баһылыга бигэ тирэхтээх, үктэлэ, ыллыга, аартыга чиҥ уонна киэҥ буолар. Күннээҕинэн олороро табыллыбат, сарсыҥҥы баарын, кэлэр кэм күүтэрин сыаналыыр күүстээх ыра санаалаах. Хас биирдии омук таһымын бэлиэтэ — эр киһитэ, кини олоххо ирдэбилэ, олоҕу көрүүтэ, айылҕаны, эбэни кытта сибээһэ — ити барыта эр киһинэн, айылҕанан дьайыллар эбит. Эр киһинэн норуот сыаналанар: кини тубарсыйан, кэхтэн эрэрэ дуу, сайдыы таһымыгар тахсан эрэрэ дуу, эбэтэр кэлэр кэм буолар уларыйыыларга олук уурсара дуу, уурсубата дуу. Эр дьон нөҥүө, кини дьүһүнүнэн-бодотунан, саҥатынан- иҥэтинэн, үлэтинэн-хамнаһынан, бүппэт түбүгүнэн, салайар-такайар дьоҕурунан сылыктаан бүтүн норуокка сыана быһаллар эбит. Эдьиий Дора
- Эр үтүөтэ ойоҕо, оҕото-уруута суох буоллаҕына, дьиэтэ-уота хобдохсуйар, кэскилэ кэрэгэй дьылҕаланар. Дапсы
