Сымыыт үрүҥүттэн астанар меренгэ диэн олус сымнаҕас уонна минньигэс ас баарын билэбит. Бу аһы астыырга элбэх ингредиент наадата суох. Сүрүн бородуукталарынан сымыыт үрүҥэ, саахар, күөрчэх буолаллар. Киһи айаҕар ууллан хаалар, былыты санатар аһы астаныҥ, күндү дьоҥҥутун күндүлээҥ.
Сымыыт үрүҥэ — 4 устуука
Мэлии саахар (сахарная пудра) — 220 г
Лимон кислотата — кымаах
Кукуруза крахмала — 1 улахан ньуоска
Биһилигэ:
Күөрчэх үүтэ (33%) — 200 мл
Иэдьэгэй сыыр (творожнай сыыр) — 200 г
Мэлии саахар — 40 г
Туолбата:
Малина эбэтэр сөбүлүүр отонуҥ
Астааһына:
Сымыыт үрүҥүн үчүгэйдик миксерынан эрийтэрэбит, мэлии саахары, лмион кислотатын эбэбит. Үчүгэй, тура сылдьар кэлимсэ буолбутун кэннэ, меренганы халыыпка тэлгэммит пергамент кумааҕы үрдүгэр кутан тэнитэбит уонна 150 кыраадыска диэри сылыйбыт духуопкаҕа 20-25 мүнүүтэ буһарабыт. Буһа турар кэмигэр крем бэлэмниибит. Холодильникка турбут күөрчэх үүтүн мэлии саахары кытта миксерынан кыратык ытыйабыт, ол кэннэ иэдьэгэй сыыры эбэн кыра күүскэ эрийтэрэбит. биир кэлимсэ буолбутун кэннэ меренгэ үрдүгэр ымньыыбыт уонна үрдүгэр малиналары уурабыт. Рулет гына суулуубут. Холодильникка уган аҕыйах чаас туруора түһэр ордук. Минньигэстик аһааҥ.
