Үүнэр 2024 сыл — дракон бэлиэлээх. Бу айылҕаҕа суох кыыл биһиги олоҥхобутугар Уот Садаҕа моҕой диэн ааттанан киирбит. Кинини үөһээ уонна аллараа дойду бухатыырдара көлө оҥостоллор. Уот Садаҕа Улуу Куйаар олохтооҕо. Көрүҥэ: 4-6 атахтаах, биир бастаах (алларааҥҥы хас да хос бастаах, кыната суох), көтөр кынаттаах, тимир килиэ. Ураты көрүҥнээх буолан күлүмүрдэс, дьэрэкээн, кыһыл өҥнөру сөбүлүүр буолуон сөп. Майгыта: тыйыс, араас кубулҕаттаах эрээри иччитигэр бэриниилээх. Холобур, Улуутуйар Улуу тойон үс дойдуга аатырбыт бухатыыр уола Уот Уһуму Тоҥ Буурай төрүүрүн кытта бу кыылы биэрэр. Төһө да бииргэ улаатталлар иччитэ көлөтүн уон саастааҕар эрэ кыайа тутан айааһыыр. Уот Садаҕа куйаартан түһэригэр, айылҕа күүстэрэ арыаллыыллар: аан холорук, сүллэр этиҥ, сааллар чаҕылҕан… Ол иһин кэлэр сыл күүтүллүбэтэх үчүгэй даҕаны, куһаҕан даҕаны быһыыларынан баай буолуон сөп. Остуоруйа, олоҥхо кыыла буолан бырааһынньыгы таптыыр. Баһын быстахха төттөрү үүнэ турар. Уот тыыннаах, онон уоттан сэрэх буолуҥ!
