Клубника кэрэ көстүүлээх эрэ буолбакка, амтанныын, сыттыын ураты буоллаҕа. Ол да иһин кэлиҥҥи кэмҥэ клубниканы олордуон баҕалаах элбээн иһэр. Бу отону хайдах көрөн-истэн, өлгөм үүнүүнү ыларбыт туһунан оҕуруотчут Анджелика Евдокимова Ефремова кэпсиир.
ОЛОРДУУ
Клубниканы тохсунньу ыйга сиэмэнэн олордобун. Торфтан оҥоһуллубут анал бөкүнүктэргэ, эбэтэр үчүгэйдик көпсөтүллүбүт, сиидэлэммит буорга үүннэрэбин. Атын рассадалары курдук, улаатан истэхтэрин аайы сөптөөх иһиттэргэ көһөрөбүн. Таһырдьа таһаарыахпар диэри үчүгэйдик көрөбүн-истэбин, бүөбэйдиибин.
Мин сиргэ олордорбун сөбүлүүбүн. Кирээдэҕэ, үрдүк сиргэ буолбакка, сири хорутан, онно кумах, ноһуом эбэн көпсөркөй буор оҥоробун. Ону тору-томточчу мунньан баран, үрдүнэн сииги тутарга анаммыт хара матырыйаалы бүрүйэбин, мээрэйдээн хайаҕастары быһабын, лууҥка хаһабын.
УОҔУРДУУ
Хайа баҕарар уоҕурдууну кутуом иннинэ үүнээйибэр көннөрү уу кутабын, тоҕо диэтэр уоҕурдуу сииктээх эрэ буорга кутуллар. Биэдэрэҕэ күөх от үргээн сылаас сиргэ сытыта уурабын. Үс-түөрт күнүнэн сытыйан, ото сүппүт буолар. 1 л баһан 10 л ууга булкуйабын уонна аһатабын. Маннык уоҕурдуу азотунан баай буолар, саҥа олорбут клубникаҕа күөх массатын ыларыгар, ото-сэбирдэҕэ үүнэригэр көмөлөһөр. Иккис сырыыга фосфорунан уонна калийынан баай аһылыгынан уоҕурдабын. Оччоҕо уга сайдар, сэбирдэҕэ элбиир, сибэккилэнэр. Аһын үчүгэйдик биэрдин диэн клубника
ҕа анаммыт уоҕурдууну ууга суурайан кутабын. Ол курдук 10 хонук, биитэр икки нэдиэлэ буола буола аһатабын.
Икки ыстакаан мас күлүн биир биэдэрэ ууга суурайан тэпилииссэҕэ уурабын. Онтум суукканы быһар турар, кэлэ-бара булкуйа сылдьабын. Кэлин бу уубун сиидэлээн биирдии хомуоһу клубникам угар кутабын. Маннык уу элбэх калийдаах, туһалаах элеменнэрдээх, үүнэригэр сайдарыгар үчүгэйдик көмөлөһөр.
БОРНАЙ КИСЛОТА УОННА МАРГАНЦОВКА
Итини таһынан, ыалдьыбатыннар диэн, борнай кислоталаах суурадаһыны туттабын. Бу кислота сибэкки астанарыгар көмөлөһөрүн үгүскүт билэр. 2 г марганцовканы уонна
биир улахан ньуоска дьуоту 10 л ууга булкуйабын, манна биир ыстакаан итии ууга суураллыбыт 2 г борнай кислотаны кутабын. Борнай кислота эмтиир-томтуур хаачысты
бата итии эрэ ууга арыллар. Пульверизатор көмөтүнэн клубника сэбирдэҕэ барыта илийиэр диэри ыстарабын. Марганцовка грибоктаах-бактериялар даах ыарыылартан сэрэтэр, үнүгэс иммунитетын көтөҕөр.
Сайын устата уктарын көрө сылдьан ыалдьаары гыммыт эбэтэр өҥө уларыйбыт сэбирдэхтэри ылҕыыбын. Чэбэрдик туттан көрө сырыттахха, клубника махтанан силигилии үүнүөҕэ, өлгөм астаныаҕа.
ЛУУҤКАҔА КУТАБЫН:
• биир улахан ньуоска сиидэлэммит мас күлэ;
• биир улахан ньуоска хаппыт, кырбастаммыт банан хаҕа;
• кыра кымаах ноһуом уонна фитоспориннаах сылаас уу;
• биир улахан ньуоска мэлиллибит сымыыт хаҕа.
Бу бэлэмнээбит лууҥкабар клубниканы таһааран олордобун. Оччоҕуна бэркэ үүнэр, хара матырыйааллаах буолан сиигин тутар, сыыс от үүммэт, астаннаҕына, отоно буорга буолбакка, ыраас таҥаска сытар.
Фитоспорин препараты сөбүлээн туһанабын. Хас үһүс уу кутуубар фитоспориннаах ууну туттабын. Биир улахан ньуоска фитоспорины 10 л ууга суурайан лейканан кэрийэ сылдьан эмиэ сииктээх буорга кутабын. Оччоҕуна үүнээйи доруобай, ыалдьыбат буола
улаатар.
Анна Павлова
