Бүгүн, алтынньы 28 күнүгэр, биллэр судаарыстыбаннай уонна уопсастыбаннай деятель, Амма улууһун бочуоттаах гражданина Светлана Ефимовна Николаева баара буоллар 85 сааһын туолбут буолуо этэ.
Светлана Ефимовна 1941 сыл алтынньы 28 күнүгэр Дьокуускайга күн сирин көрбүт. Ол эрээри оҕо сааһа Бөтүҥ кэрэ кырдалларыгар ааспыт.
Саха судаарыстыбаннай университетыгар үөрэҕин бүтэрэн баран, кини үлэтин суолун Амма орто оскуолатыгар оҕолору математикаҕа үөрэтэн саҕалаабыта. Эдэр киһи хомсомуол уонна баартыйа үлэтигэр умсугуйан туран кыттыспыта. Бастаан Амматааҕы хомсомуол кэмитиэтин, онтон Дьокуускайдааҕы уобаластааҕы хомсомуол кэмитиэтин бастакы сэкирэтээринэн буолбута. Мирнэйдээҕи баартыйа кэмитиэтигэр сэкирэтээрдээбитэ. 1982 сыллаахха ЦК КПСС иһинэн уопсастыбаннай наука академиятыгар үөрэммитэ.
1986 сылтан 1990 сылга диэри Саха АССР культураҕа министиэристибэтин салайбыта. Ол сылларга култуура тэрилтэлэрэ сайдыы суолугар үктэммиттэрэ, бибилэтиэкэлэргэ ааҕар саалалары сайыннарбыттара, түмэл ситимэ кэҥээбитэ – тыа сиригэр дьоҕус түмэллэр аһыллыбыттара.
1990 сылларга Светлана Ефимовна Үлэ, социальнай харыстабыл уонна дьарыктаах буолуу министрин солбуйааччытынан үлэлээбитэ уонна Дьиэ кэргэн, ийэ, оҕо харыстабылын поундатын дириэктэринэн олорбута.
Маны таһынан Светлана Николаева 30 сыл Саха сирин дьахталларын хамсааһынын лидерэ этэ: 1991 сыллаахха Өрөспүүбүлүкэтээҕи дьахтар сэбиэтин салайааччытынан буолбута, 1995-2001 сылларга Өрөспүүбүлүкэ дьахталларын сойууһугар бэрэссэдээтэллээбитэ. 2011 сылтан СӨ уопсастыбаннай палататын чилиэнэ этэ.
Светлана Ефимовна «Знак почёта» уордьанынан, «За трудовую доблесть», «Найрамдал» монголлар мэтээллэринэн, Софья Сидорова аатынан бочуот бэлиэнэн уонна да атын улахан наҕараадаларынан бэлиэтэммитэ.
Светлана Николаева Саха сирин сайдарыгар күүстэрин-уохтарын ууран туран үлэлээбит көлүөнэ дьоҥҥо киирсэр. Кини сырдык аата умнуллубат.
