Хатастааҕы «Тускул» култуура киинигэр «Ийэбиниин бииргэ» кэнсиэргэ олус ураты муода көрдөрдүлэр. Бииртэн-биир олус кэрэ, нарын былаачыйалаах кыргыттар кыталык курдук устан киирдилэр. Букатын «Унесенные ветром» киинэ көрө олорор курдук сананным. Бу винтажнай былаачыйалар ааптардара Евгения Сосина (Тастыгина).
Евгения Сосина- Аҕам Мэҥэ Хаҥалас, ийэм Өлүөхүмэ буолан икки дойдулаахпын. Кыра эрдэхпинэ Өлүөхүмэҕэ олорбуппут, кэлин Мэҥэҕэ. Быйыл Хатаска кэлэн олохсуйдум. Сүрүн дьарыгым хаартыскаҕа түһэрии уонна иис. Бу оҕо эрдэхпиттэн кэлсибит үөрүйэхтэрим диэтэхпинэ алҕаһаабаппын. Оҕо сылдьан пленканан барар фотоаппараттаах этим, тулалыыр эйгэбин түһэрэрим. Ол иһин оскуола сылларыттан, устудьуон олоҕуттан олус элбэх хаартыскалардаахпын. Ол кэннэ сотовай телефоннар кэлбиттэрэ, олор камераларын соччо сэҥээрбэтэҕим. Оскуола кэннэ Питерга үөрэнэ барбытым уонна онтон фотоаппарат ылбытым. Фотограф буолуом дии санаабат этим, хайдах эрэ саҕыллан, ис-испиттэн сөбүлүүр дьарыгым этэ. Үөрэхпин бүтэрэн Саха сиригэр кэлэн учууталлаабытым. Үөрэнээччилэрбин хаартыскаҕа түһэрэр буолбутум. Кэлин оҕолонон баран хаартыскаҕа түһэриини олус интэриэһиргиир, сайдыахпын баҕарар буолбутум. Куйаар ситимигэр Маргарита Карева хаартыскаларын көрөн олуһун астыммытым, иэйии киирбитэ. Кини курс атыылыыр этэ, бэйэтин кэмигэр олус сыаналааҕа. Харахпын быһа симэн иэскэ да киирэн туран ол курсу атыыласпытым. Ол саҕана мин үһүс оҕобун оҕолонон олорор кэмим этэ. Бу курс кэннэ аа-дьуо түһэрэн саҕалаабытым. Оччолорго кыра дэриэбинэҕэ олоробут, нэһилиэнньэтэ аҕыйах. Хаартыскаҕа түһүөн баҕалаах суоҕун кэриэтэ, куоракка курдук буолуо дуо? Ол курдук учууталлаабыт үөрэнээччилэрбин кыргыттары түмэн сайын аайы хаартыскалыыр буолбутум. Кыһын үлэлиибит, сайынын уоппуска кэмигэр диэн. Онно куруук таҥас көрдүүбүн. Дэриэбинэҕэ хаартыскаҕа түһэр сир диэн айылҕа буоллаҕа. Онно биһиги күннээҕи мааны таҥаспыт арыый барсыбат курдук дуу дии санааччым. Ол иһин айылҕаҕа сөптөөх романтичнай, сценическэй таҥас барсыа эбит диэн толкуйтан таҥас тигэн саҕалаабытым. Түүннэри тигэбин, сарсыарда күнү көрсө хаартыскаҕа түһэрэбин.
-
Screenshot - Бастаан оҕолорбор уһуйааҥҥа араас маскарааттары, көстүүмнэри тигэртэн саҕаламмыта. Дьигинэ, бу санаатахха, иискэ кыра эрдэхпиттэн интэриэстээхпин эбит. Оҕо сылдьан ийэм бииргэ төрөөбүттэрин оҕолорун кытта мустан ким тугу булан аҕаларынан, ийэлэрбит таҥастарын кырыйтаан араас таҥас тиктэр этибит. Онтубутун таҥнан маҕаһыыҥҥа килиэп ыла барарбыт. Улаатан баран уурбут-туппут курдук иистэниээтээхпин диэн санааттан оскуола иһинэн тэриллибит иис куруһуогар сылдьыбытым. Бастаан оҕолорго туһаайыллыбыт буоллаҕына, кэлин улахан дьону эмиэ дьарыктыыр буолбуттара. Онно Светлана Кимовна Громова үгүскэ үөрэппитэ. Ол кэмҥэ уһуйаан сэбиэдиссэйэ этим. Оҕолор кыттар куонкурстарыгар анаан араас таҥаһы тикпиппит. Билигин даҕаны профессиональнайдык иистэнэбин дэммэппин. Күннэтэ бу сатабылбын чочуйабын.
Идеялар миэхэ арааһынайдаан кэлэллэр. Холобур классическай музыканы сөбүлүүбүн, XIX үйэтээҕи, историческай, вестерн киинэлэри көрөбүн. Оччоҕуна араас идея уһуктар. Өссө быыкаайык тимэхтэн идея киириэн сөп, төбөбөр араас уобарас үөскүүр.
Бастаан таҥас өҥүн-дьүһүнүн талабын, ол кэннэ тигиллэр кэмигэр хаста да быһыыта-таһаата уларыйыан сөп.
Айылҕаҕа сылдьарбын сөбүлүүбүн. Өҥү-дьүһүнү дьүөрэлиэххин баҕарар буоллаххына айылҕаны көр дииллэрэ кырдьык. Холобур лыаҕы ылан көр, кини кынатыгар хас дьүһүн дьүөрэлэспитий? Ол барыта бэйэ-бэйэлэригэр барсар өҥнөр. Аҥардас күһүҥҥү хатыҥ сэбирдэҕин көрдөххө хас да өҥ баар буолар, бу мантан сиэттэрэн былаачыйа оҥорон таһаарыахха сөп.
Бу коллекциям аата суох. Винтажнай былаачыйалар. Эрдэ илиҥҥи омук таҥастарынан үлүһүйэр этим. Ол үксүн аһаҕас таҥастар, эдэр кыргыттарга барсаллар этэ. Ол иһин болҕомтобун винтажнай таҥаска уурдум. Сабыылаах, нарын, кэрэ, романтичнай уобараска олус барсар.
