Төрөппүтү оҕотун кытары туох ситимниирий, алаһа дьиэни туох сылаас тыынныырый? Дьиэ кэргэҥҥэ олохтоммут үгэстэр. Ол үгэстэр дьиэҕэ тапталы биһиктииллэр, дьолунан толороллор.
Биһиги билэр ыалларбытыттан: «эһиги дьиэ кэргэҥҥитигэр бэйэҕит толкуйдаабыт үгэстээххит дуо?», – диэн ыйыттыбыт. Маныаха киһи сүрэҕин сылытар кэпсээннээх дьон элбэх буолан биэрдэ.
«Биһиги хас субуота аайы ийэбит тура илигинэ сарсыардааҥҥы аһылыгын сюрпризтаан бэлэмниибит. Оҕолор ийэлэрэ уһуктан баран төһө эрэ үөрэрин оҥоророн көрө-көрө олус кыһаллан туран бэлэмнииллэр», – диэн ыал аҕата Николай кэпсээтэ.
«Хас бээтинсэ аайы киэһэ киносеанс тэрийэбит. Сымнаҕас сыттыктары, түү былааттары муостаҕа тэлгэтэбит. Уоттары сабабыт, гирляндалары холбуубут уонна аҕалыын, оҕолордуун киинэ көрөбүт. Мин үлэбиттэн кэлэн баран баттаһа минньигэс буһарабын, эбэтэр бириэмэм тиийбэтэҕинэ маҕаһыынтан атыылаһабын. Дьэ бары, минньигэс сии-сии киинэбитин, сороҕор мультфилм көрөбүт», – диир эдэр ийэ Айыына.
«Саас уонна күһүн бары дьиэ кэргэнинэн похуодка сылдьабыт. Компас, тиэрмэскэ итии чэй, ас ылабыт уонна айылҕаҕа тахсан аһыыбыт. Мээчиктиибит. Ийэбит кыргыттарын кытта гербарий хомуйааччы», – диэн үллэстэр ыал аҕата Ньургун.
«Биһиги дьиэ кэргэҥҥэ биир сөбүлүүр үгэстээхпит. Үс оҕолоохпут, икки кыыс уонна уол. Өрөбүл күн сууйуу-сотуу үлэтин бүтэрэн баран, кыргыттарбын кытта интернеттэн көрөн сонун ас буһарабыт. Кыргыттар куукунаҕа букунаһабыт. Оттон аҕабыт уолун кытта спортивнай саалаҕа баран дьарыктаналлар. Онтон киэһэ бары көрсөн сонуммутун кэпсэтэ-кэпсэтэ аа-дьуо аһыыбыт. Бу үгэспит биһигини олус ситимниир, чугасаһыннарар. Үлэ күннэригэр барыта ыксал буолан, маннык холкутук сылдьыбаппыт. Онон өрөбүлгэ бу үгэспитин көтүппэт буола сатыыбыт», – диэн кэпсээтэ ыал ийэтэ Сардаана.
