Эрэннэрбиппит курдук, бүгүн «Уот Дьулустаан» сериалга Хобороос оруолун толорбут Сандаара Федотованы кытта кэпсэтиибитин таһаарабыт.
— Мин Үөһээ Бүлүү улууһун Далыр диэн нэһилиэгиттэн төрүттээхпин. Биэс кыыс оҕолоох Николай уонна Татьяна Федотовтарга саамай кыралара буолабын. Оскуола кэнниттэн Москватааҕы М. С. Щепкин аатынан үрдүкү театральнай училищаны ситиһиилээхтик бүтэрбитим.
Кыра сылдьан Ефросинья Егоровна Софронова «Мэнигийээн» диэн цирковой студиятыгар дьарыктаммытым. Онтум артыыс идэтин баһылыырбар улаханнык көмөлөстө дии саныыбын.
Хобороос оруолун туһунан кэпсиир буоллахха, эрдэ маннык уобараска оонньоон көрө илик этим. Ону билбит курдук, биир үтүө күн режиссер Елена Эверстова тахса сылдьыбыта уонна: «Уот Дьулустаан» сериалга хамначчыт кыыс оруолугар эйигин көрөбүн»,-диэн соһуппута. Онтон көрсөн аҕыйах сыананы аахтаран көрбүтэ уонна бигэргэппитэ. Бу уобарас дьиҥ олохпор иҥэн хаалыа диэммин наһаа куттанабын. Ол эрэн, Хоборооһу кытта отой майгыннаспаппыт. Атын режиссердар: «Бу кыыс лирическай, характернай оруоллары оонньуон сөп эбит»,- диэн өйдөөн көрүөхтэрэ диэммин эрэнэбин. Ол иһин, араас уобарастары арыйан оонньоон көрүөхпүн баҕарабын. Үлэбэр, Саха тыйаатырыгар аан бастаан «Кэрэ көмүскэлигэр» диэн испэктээкилгэ Таня Монастыреваны оонньообутум. Ону таһынан, «Үйэлэри уҥуордаан» диэн Степан Максимович Аржаков үбүлүөйүгэр аналлаах испэктээкилгэ, кини кэргэнин Варвара Ивановна Аржакованы оонньуубун. Этэҥҥэ буоллаҕына, гостуруоллар кэнниттэн өссө икки испэктээккэ «сүрэхтэниэхтээхпин».
Оонньуу тахсаары туран, бастаан бэйэбин настройданабын. Уоскуйан хомулла түһэбин, ыарырҕатар сыаналарбын хатылыыбын уонна тылбын имитэбин.
Үлэ кэмигэр араас көрдөөх да, ыксаллаах да түгэннэр тахсаллар бөҕө буоллаҕа дии. Олортон биири кэпсиэхпин баҕарабын. «Уот Дьулустааҥҥа» Ыстапааннаах аттаах сыаналарын уста сылдьан, Данил Осиповка (Ытсапааҥҥа) сиппит-хоппут, оҕус курдук көрбүт сылгыны туттаран кэбистилэр. Арай, тыаҕа уста сырыттахпытына, Данилбыт тигээйилээх суолга түбэһэн хаалан хаалбыт этэ. Онно сылгыта кыылыйан хаалбытыгар боччумнаах бэйэтэ уолуйан ыксаабыт, куттаммыт дьүһүнүн билиҥҥэ диэри өйдүүбүн. Ол кэмҥэ киһи күлбэт кутталлаах түгэнэ буолбута. Билигин саныырга көрүдьүөс баҕайы эбит.
Венера Охлопкова
