Дорообо, дойдум.
Кэллим ээ, кэллим.
Туох ааттаах чуумпуран,
Чуҥкуйан көрүстүҥ?
Таһырдьа саас ыллыыр.
Санныбын саас баттыыр.
Кураанах тэлгэһэ
Баттыыр, хам баттыыр.
Тоҕус аар хатыҥым
Арчылыыр суугуна
Ол кэмҥэ хаалбыта.
Онтон биир орпута
Аҕалаах ийэбин,
Оҕочоос саастарбын
Санатан тураахтыыр.
Дьэп-дьэҥкир салгыннаах
Бэс чагдам быыһыгар
Арай, дьэ, дьүүктэбит
Дьүккүөрэ мөлтөөбөт –
Кыһынын-сайынын
Салпакка сыккыстыыр.
Дорообо, дойдум.
Кэллим ээ, кэллим.
Уонунан сылларга
Ахтыбыт санаабын
Агдакам иһигэр
Хатааммын сырыттым.
Барбыттар, сүппүттэр,
Үгүстэр көспүттэр.
Ким эрэ дьоллоохтук,
Ким эрэ аматык
Олорон ааспытын
Оҥойбут түннүктэр
Саҥата суоҕунан
Саната тураллар.
Мин эмиэ барбытым –
Дьол-соргу көрдөнө,
Олохпун тэринэ.
Таҥнарыы буолар дуо –
Ыраны батыһыы?
Быһаччы этэрим
Кыаллыбат. Билбэтим.
Дорообо, дойдум.
Кэллим ээ, кэллим.
Оҕочоос кэмнэрбэр
Бар дьонум уйгутун
Уһансар, тускулуур
Балысхан санаабын
Бастыҥнык тутарым.
Сирийэн көрдөххө
Сил да саҕаны
Сирбэр-уоппар, дьоммор
Утары уумматах
Уһуйдах эбиппин.
Бу ыар буруйбун
Туохпунан боруостаан
Санаабын чэпчэтиэх
Бэйэбиний?
Бу хара аньыыбын
Ханнык дьайыыбынан
Ыраастаныах
Кэриҥнээхпиний?
Дорообо, дойдум.
Кэллим ээ, кэллим.
Бу манна, Эн дуолгар
Халлааныҥ үрдүгүөн!
Салгыныҥ ырааһыан!
Сулуһуҥ сырдыгыан!
Былытыҥ чарааһыан!
Оннооҕор Үрүҥ Күн
Туора сирдээҕэр
Айыы тыынын
Ордук толорутук
Кутарга дылы.
Манна, дойдубар,
Миигин билэр киһи
Биир да хаалбатар даҕаны
Эргиллэн кэлэ туруохпун
Баҕардаҕым үһү.
Дорообо, дойдум.
Кэллим ээ, кэллим.
Ол эрээри сарсын
Ааһа барар буоллум.
PS.
Бу курдук курустук
Суруйар баҕам суоҕа.
Дойдулаах киһибин ээ
Баара-суоҕа…
Мэхээс Сэмэнэп, Кириэстээх. 03.04.2008 с.
