Бу көстөр ураты тутуулаах баараҕай дьиэ «Сатал» түөлбэтигэр дьэндэйэн турар. Икки мэндиэмэннээх мас дьиэни кытта силбэһэ тутуллубут саха балаҕана үгүс дьон болҕомтотун тардар буолуохтаах. Бу – Яна Попова хас эмэ сылы быһа ыралаан, былааннаан туппут көмүс ньээкэ уйата.
Хаһаайка дьиэтин маһын анаан-минээн Красноярскайга тиийэн көрдөөн булан, тутан хабан көрөн, 30–40 см кэтиттээх Иркутскай бэстэрэ дэнэр мастары аҕалтарбыт. Бу канадалыы технологиянан кэрдиллибит, анал камераҕа куурбатах-хаппатах мастар. Оцилиндровкаттан уратылара диэн барыта илиинэн оҥоһуу. Саха сиригэр маннык маһынан тутуллубут дьиэ ахсааннаах буолуохтаах. Үөрүйэх тутааччылар да суохтарын кэриэтэ. Инньэ гынан, дьиэтин бырайыагын эрдэ оҥорон баран балаҕанныын баҕастыын анараа туттарбыт. Ону көтүрэн аҕалан уһаайбатыгар конструктор курдук таҥан таһаартарбыт. Кыһын кэрдиллибит мас буолан, улахан көҕөрүүтэ-наҕарыыта
суох. Маннык дьиэ биир үчүгэйэ диэн ханапаакыламмат эбит. Тоҕо диэтэххэ, канадалыы кэрдии диэн ньыманан тутуллар. Ол аата хас эргиири түһэрэн истэҕиҥ аайы мастар күлүүс курдук бэйэ-бэйэлэригэр ыпсыһан иһэллэр. Маннык маһынан тутуллубут дьиэ көҥдөйө үс сыл туруохтаах. Оччоҕо эрэ барыта тэҥинэн куурар-хатар, түһэр, оннун булар. Яна дьиэтин 2021 сыллаахха туттан саҕалаабыт уонна быйыл саҥа киирбит. Маннык дьиэни туттар санаа хайдах кэлбитин туһунан кини бу курдук кэпсиир: «Дьиэ бин туттуом иннинэ хайдаҕы баҕарарбын чопчу билбэт этим. Инньэ гынан, куорат эргин чааһынай дьиэлэри кэрийэн, дьон ханнык маһынан, хайдах быһыылаахтык тутталларын көрөрүм. Ол сылдьан хараҕым биир дьиэҕэ хатаммыта. Эмиэ бу курдук төкүнүк маһынан тутуллубут этэ. Ону көрөн наһаа сөбүлээбитим уонна маннык курдук дьиэни баҕарар эбиппин диэн быһаарыммытым. Оттон балаҕаны сыста тутуу туһунан этэр буоллахха, биһиги ыалларбыт оннук дьиэлээхтэр. Олортон сүһэн ылбытым. Хаһаайын уус буолан, туттар кэммэр сүбэлээн амалаан олус көмөлөспүтэ. Дьиэбэр уопсайа 178 куб мас киирбитэ. Бастаан аһара улахан буолара буолуо дии санаабытым, хата, сөрү-сөп буолла». 
Дьиэ ис өттүнэн 200-чэ кв. м иэннээх. Бастакы этээс үрдүгэ 3 м 70 см, оттон иккис этээс кырыыһата мансарда буолан, намыһах сиринэн 1м 80 см, саамай үрдүгэ быһа холоон 4 м. Акылаата лиэнтэ. Бачча бөдөҥ мастары уйар гына күүһүрдэн уонна дьиэ иэниттэн арыый улахан гына оҥорбуттар. Бастакы этээс бүтүннүү сылаас муосталаах. Манна балаҕаны кытта тастан киириигэ аан хос, холбуу куукуна, саала уонна кэбиниэт, кыладыапка, тахсан киирэр, таҥас сууйар хостор бааллар.
Балаҕан 6 да 6-лаах, 3 м 70 см үрдүктээх, канадалыы муннуктаах, үс түннүктээх. Көҥдөйө турбутун кэннэ эркинин саха уустара оҥорбуттар. Буруус маһы профилируйдаан, сылааһын тутар гына эбии хаттыктаан биэрбиттэр. Онон ааспыт кыһыны этэҥҥэ туораата диэн хаһаайка хайгыыр. Ис бараана эмиэ уурбут-туппут курдук оҥоһуулаах. Икки өттүнэн арыллар наара ороннордоох, оһохчут Гаврил Черноградскай туппут «бааһынай» көмүлүөктээх. Аҥаардас оһоҕун эрэ оттон ас аста
ныахха эмиэ сөп. Ону таһынан, 22 кв. м иэннээх аһаҕас верандалаах. Манна инникитин ас астыыр, аһыыр сирдээх буолуохтаах. Дьиэлээхтэр ыалдьыттары балаҕаннарыгар чэйдэтэллэр, бырааһынньыктары манна ылаллар. Тэрээсэ, камин оннугар көмүлүөктээх балаҕан ордук эбит диэн хаһаайка астына кэпсиир. 
Бастакы этээскэ биир сүрүн миэстэни үөһэ тахсар мас кирилиэс ылар. Манна чугуун балясиналар ураты кэрэ көстүүнү биэрэллэр. Дьиэ уонна балаҕан иһинээҕи үлэтин – үктэли, түннүктэр наличниктарын, хостор ааннарын олоччу барытын Айсен Борисов диэн мас ууһа оҥорбут. Оттон тастан киирэр аан – Nikason brand үлэтэ.
Дьиэ 12 түннүктээх, биир болкуоннаах, саала түннүгэ 2,2 х 2,2 м кээмэйдээх панорамнай диэн ааттанар. Түннүктэр таастара үрүҥ көмүс дуйдаах. Инньэ гынан,
күн уотун 100% да буолбатар туталлар. Оттон кыһыҥҥы кэмҥэ төттөрүтүн сылааһы таһаарбаттар.
Иккис этээскэ икки утуйар хос, тахсан киирэр сирдээх душ уонна тахсааты кытта киэҥ-куоҥ саалаҕа хаһаайка баҕатынан спордунан дьарыктанар сир оҥоһуллубут. Онон эти-хааны уһугуннаран баран болкуоҥҥа тахсан үүттээх чэй иһэ-иһэ үлэни-хамнаһы былаан нанарга бэртээхэй усулуобуйа олохтоммут.
бараанын
дизайна хай
дах буолара бу
былыргылыы
оҥоһуулаах
ыскааптан
«төрөөн» тах
сыбыт.
Яна Попова: «Дьиэ дизайныгар өҥү-дьүһүнү, миэбэли талыыга муоданы эккирэппэккэ, классиканы тутуһа сатааҥ диэн сүбэлиибин. Тоҕо диэтэххэ, миэбэли хаһан баҕарар уларытыахха сөп. Оттон дьиэ эркинин өҥүн уларытар уустуктардаах буолуоҕа. Уопсайынан, идэлээх дизайнер өҥөтө олус көмөлөһөр эбит. Мин дьиэбин Ксения Громова диэн эдэр дизайнер оҥорбута. Кини аҥаардас хартыынаттан сүһэн ылбакка, түө бэйэ уратылаах оҥоро сатыыр, бытархай малга-салга тиийэ барытын талар.
Кини дьиэ дизайныгар үс сүрүн өҥү туттарга сүбэлиир. Онон дьиэм эркинин, үрдүн карамель өҥнөөх арыынан соппуппут. Оттон түннүктэр наличниктара, хостор ааннара,
куукуна алларааҥҥы ыскааптара уонна дьыбаан халлаан күөх өҥнөөхтөр, батарыайалар, кыра светильниктэр, уот боруобаттара харалар. Ону таһынан, араас матырыйааллары дьүөрэлиир олус ураты көстүүнү биэрэр. Холобур, чугуун баля синалардаах мас кирилиэһи кытта үөһээ ыйаммыт хурустаал люстра сонуннук көстөр.
Иккиһинэн, мас дьиэ эркинин шлифовкалаан, грунтовкалаан баран арыынан сотуҥ диэн сүбэлиибин. Ханнык баҕар мас син биир эргэрэр. Өскөтүн эрдэ кырааскаламмыт буоллаҕына, ону барытын хаттаан шлифовкалыахха наада. Ону таһынан, кырааска күн уотуттан түргэнник умайар. Оттон арыынан сотуллубут буоллаҕына, шлифовкалаабакка эрэ хос сотуохха сөп. Тоҕо диэтэххэ, арыы мас сааһыгар киирэн иҥэр. Дьиэ таһын хараҥа өҥүнэн сото сатааҥ. Ол күн уотуттан үчүгэйдик харыстыыр. Бу курдук бэйэм үөрүйэхпиттэн сүбэлэрбин социальнай ситимҥэ булан көрүөххүтүн сөп».
Алаһа дьиэҕит сырдык, ыраас буоллун, дьолунан туоллун!
Венера Охлопкова, Юлия Пестрякова түһэриилэрэ
