“Прощание с Матерой” диэн Валентин Распутин сэһэнинэн туруоруллубут испэктээкили сүрэхтээһин буоларын туһунан бүгүн Саха тыйаатырын уус уран салайааччыта, туруорааччы режиссер Андрей Борисов, толорооччу артыыстар медиакииҥҥэ кэлэн суруналыыстарга кэпсээтилэр. Испэктээкилгэ тыйаатыр бары көлүөнэ артыыстара оонньообуттар. Андрей Саввич саха тыйаатыра академическай буоларын ыйан туран, онуоха эппиэттиир испэктээкиллэр туруохтаахтар диир. Олунньу 21-23 күннэригэр сүрэхтэнэр испэктээкил оннук үрдүк таһымнааҕар саарбахтааһын суох. Култуурабыт эйгэтин бэртээхэй сонуна саха саҥалааҕы үөрдэрэ биллэр. Матера диэн сир үрдүттэн симэлийбит бөһүөлэк биһиги харааста ахтар Туой Хайабыт дьылҕатын санатар. Сирэ-дойдута, дьиэтэ-уота, силиһэ-мутуга суох хаалыы атаҕыҥ анныгар сир иҥнэстибитигэр тэҥнээх алдьархай буоллаҕа, тустаахха. Манна арыллар өссө көлүөнэлэр өйдөспөттөрө, сыаннастарын араастаһыыта, глобализация киһи дьылҕатыгар охсуута. Быһата, аныгы олох көстүүтэ. “Испэктээкил үйэтэ көрөөччүттэн тутулуктаах”, — диир режиссер Андрей Борисов. “Матера, бырастыы… ” кими долгуппат буолуой. Онтон сэдиптээн үйэтэ, тыына уһуур сибикилээх. Оннук да буолуоҕа.
А.Никифорова-Шадрина.
