Ньурба улууһун Маалыкайыттан сылдьар Аина Макарова уонна Томпо Кириэс Халдьаайытыттан төрүттээх Настасья Колесова аан дойдуну түөрт истиэнэҕэ хаайбыт хамсык кэмигэр бэрт туһалаах дьарыгынан үлүһүйбүттэр.
- Хамсык кэмигэр ыйы ыйдаан дьиэҕэ хааллан олордохпутуна дьааһык бөҕө мунньуллубута. Мунньан-тараан вторсырье тутар пууҥҥа илдьиэхтээх этибит. Ол кэмҥэ социальнай ситимҥэ алҕас хлопок кумааҕыттан кумааҕы кутар маастар үлэтин көрө биэрбиппит. Бу маастар үлэтэ биһигини кынаттаабыта, иэйии биэрбитэ диэххэ сөп. Ол курдук муспут хордуоннарбытыттан бастакы кумааҕыбытын оҥорбуппут. Кэлин офиска туһаныллыбыт кумааҕыларга көспүппүт. Биһиги сыалбыт-сорукпут: эргэ кумааҕыга иккис тыыны биэрии уонна сүрүнэ, айылҕаны харыстааһын. Дьокуускайга тыһыынчанан тэрилтэ баар, онно барытыгар А4 туһаныллар. Итиччэ үлүгэр элбэх кумааҕыны барытын бөххө быраҕыах диэтэххэ, киһи өйүгэр баппат хартыына буолар. Онтон ыла макулатураны кубулутан оҥорон таһаарыынан дьарыктанабыт уонна сонун, хатыламмат полиграфия өҥөтүн оҥорон саҕалаатыбыт. Биһиги өҥөбүтүнэн дойдубут эрэ дьоно буолбакка, Испания, Канада курдук ыраах дойдулартан туһаналлар. Хатыламмат, ураты кумааҕылары оҥоробут. Холобур тэрилтэ визиткатын «тыыннаан биэрэбит». Ол аата кумааҕы иһигэр араас үүнээйи сиэмэтин угабыт. 4-6 күнүнэн сиэмэ уһуктан, үүнэйитин таһаарар. Маннык тыыннаах визитканы, ыҥырыыны туппут киһи сөҕөр-махтайар. Ардыгар сайын хомуйан хатарбыт сибэккибитинэн симиибит, ардыгар күһүҥҥү хатыҥ сэбирдэҕиттэн кумааҕы оҥоробут.
Үлэбит хардыылара манныктар:
-Макулатураны хомуйуу
-Наардааһын
-Кумааҕыны бытарытабыт
-Анал киэп көмөтүнэн кумааҕыны кутабыт
-Лиистэри куурдабыт
-Макет оҥоробут
-Бэчээттиибит
Кумааҕыны оҥорорго силим, крахмал туттубаппыт. Дьиэктээх кумааҕыны хаттаан оҥоробут.
