Анал байыаннай дьайыыга өрөспүүбүлүкэ араас муннуктарыттан элбэх байыас дойдубутун көмүскүү сылдьаллар. Онтон амарах санаалаах волонтердар, ийэлэр, эбээлэр, эһээлэр, убайдар, эдьиийдэр анал байыаннай дьайыы кыттыылаахтарыгар анаан таҥас-сап тигэллэр. Тэрилтэлэр, түмсүүлэр байыастарбыт дурдалаах-хаххалаах буоллуннар диэн тохтообокко анал сиэккэ өрөллөрө тустаахтар санааларын бөҕөргөтөллөрүгэр сүдү күүс буолар.
Бу дьайыыга сылдьар биир дойдулаахтарбытын тиэхиньикэнэн эрэ буолбакка, таҥаһынан-сабынан уонна да атын уустук усулуобуйаларга табыгастаах малынан-салынан хааччыйаллар. Биир дойдулаахтарбыт кыайыы көтөллөөх дойдуларыгар этэҥҥэ эргиллэллэрин туһугар үтүө санаалаах дьон-сэргэ ким тугу сатыырынан, кыайарынан баҕа өттүлэринэн бары күүһү уураллар. Оннук биир сайаҕас санаалаах ийэни, элбэх дьон махталын ылбыт анал байыанный дьайыы волонтерун, байыаннай юриһы, Саха сирин аҕаларын лигатын эппиэттиир сэкирэтээрин, Саха сирин тутааччыларын түмсүүтүн юриһын «Гражданскай килбиэн» бэлиэ хаһаайкатын Мария Аргуновалыын сэһэргэстим. 
– Мария Галактионовна үлэҥ туһунан ааҕааччыларбытыгар билиһиннэриэххэ.
– Анал байыаннай дьайыы саҕалаанатын кытта уолуйбут дьоҥҥо юридическай көмө наадалааҕын өйдөөн, бу үлэни соҕотох кыайбаппын билинэн Саха сиринээҕи киһи быраабын көмүскүүр тэрилтэҕэ сурук суруйбутум. Ол саҕана Улан-удэ куоракка быраатым уола Оборона министерствотын кытта хантыраак түһэрсэн үлэлии сылдьара. Онно баар байыаннай чааска «Шатун» диэн 85 % Саха сириттэн, 15%- Бурятияттан быстах хомуурга барбыт байыаннайдарга батальон тэриллибит этэ. Батальон хамандыыра Саха Сириттэн сылдьар «Шатун» диэн позывнойдаах. Бастакы күммүтүгэр анал байыаннай дьайыы оперштабын начальнига Куркутов Георгий Сергеевич чаас хамандыырын солбуйааччытын Бобров Павел Александровиһы кытта билсиһиннэрээт, батальон казарматыгар илдьибитэ. Ити күнтэн мин анал байыаннай дьайыы кыттыылаахтарын кытта үлэм саҕаламмыта. 
Үлэм олуга—байыаннайдарга уонна кинилэр дьиэ кэргэттэригэр босхо юридическай көмө. Ким төлөбүрүн ыларыгар харгыстары көрсүбүккэ, ким кредитин төлөбүрүн онно сылдьар кэмигэр тохтотууга, ким сыыһа ыҥырыллыбыт диэн, ким эр-ойох буоларга регистрацияланыы боппуруостарыгар көмө оҥорбуппут. Олох барарын тухары араас боппуруостар элбэх буоллахтара! Ол быыһыгар тоһоҕоттон, туттар малтан саҕалаан, снайпер көстүүмэ, көтөр аппарааттарга тиийэ гуманитарнай көмөнү оҥорууга үлэлиирбит. Оһолломмуттары, бааһырбыттары таһар массыына көрдөөбүттэрин Ил Дархаммытыгар Айсен Сергеевичка сурукка тиһэн ыыппыппыт. Үөрүөхпүт Ил Дархан олох аҕыйах кэм иһигэр ити боппуруоһу быһаарбытыгар хайдах эрэ ис испититтэн олус долгуйбуппут. Массыыналар оһолломмут,бааһырбыт байыастары таһарга, ону тэҥэ ас-үөл булуутугар олус наадалаахтарын өйдөөбүппүт. Кэлин ыйыппытым: билигин да бастаан тиийбит массыыналар «сүүрэ» сылдьалларын истэн үөрэбит. Оо, олус да киэн туттубутум толору көмөнү тиэммит массыыналары байыаннай чаас былаһааккатыгар сүүрдэн киллэрэн «Шатуннарга» туттарбыттарыгар!
Дойдубар кэлэн баран «Боотурдарга» көмөлөспүтүм, бу көмөм ордук байыаннай төлөбүргэ туһаайыллыбыта. Үөрүөм иһин, Улан-Удэҕа барыам иннинэ суруйбут сурукпун Гурьева Сардана Михайловна сыһыаннаах министиэристибэлэри ыҥыртаан, анал дьайыыга сылдьар дьоммутугар туһааннаах көмө бара турар. Юрист быһыытынан анал байыаннай дьайыыга сылдьар уолаттарга сүбэ-ама, консультация биэрэбин. Холобур, 7 элбэх оҕолоох байыастары юридическай өттүнэн туруорсан дьиэлэригэр төнүннэртээбитим.
Телеграмҥа «Юрист страницата» диэн каналлаахпын, дьон үксэ онно суруйан ыарырҕаппыт боппуруостарын ыйытааччылар.
Саха ыччата дойдуларын көмүскэлигэр сылдьаллара барыбытын долгутар, бу курдук туора турбакка бары түмсэн, ыраахтан да буоллар төһө кыалларынан күүс-көмө, өйөбүл буолар дьоммутугар махтанабыт!
