Тапталлаахтар күннэринэн кэрэ аҥаардартан кинилэр кэргэттэрэ хайдах тапталларыгар билиммиттэрин туһунан ыйыталастыбыт.
Надежда уонна Алексей
– Кэргэмминээн 7 кылаастан билсэбит. Оччолорго кини улууска, мин куоракка олорор этибит. 11 кылааска сылдьан тоҕо эрэ суруйсубат, билсибэт буолан хаалбыппыт. Арай, туттарса сылдьан ыhыахха көрсө түспүппүт уонна ол кэнниттэн олох көрсүбэтэхпит. Устудьуоннуу сылдьан Саҥа дьылга биирдэ көрсүбүппүт. Онтон олунньу 14-гэр тапталлаахтар күннэригэр үөрэнэ олордохпуна, кыргыттарым: “эйиэхэ ким эрэ кэлбит”, – диэтилэр. Тахсыбытым кэргэним турар эбит уонна: «Модуҥҥа кэнсиэргэ барыахха”, – диэн ыҥырбыта. Дьиҥэр, ол күн циркаҕа барыахтаах этим. Дэлби толкуйга түстүм. Киэһэ дьиэбиттэн циркаҕа диэри такси ыҥыран айаннаан иһэммин, олох да Модуҥҥа илтэрдим. Киирбитим киһим утары көрүстэ уонна: “аны хаһан да эйигин сүтэриэм суоҕа”, – диэн баран кууһан ылбыта. Онтон ыла олунньу 14 күнэ чахчы биһиги күммүт. Бары тапталлаахтары бүгүҥҥү күнүнэн эҕэрдэлиибит, тапталгытын харыстааҥ!
Наталья уонна Анатолий Карамзиннар
– Өлүөнэ остуолбаларыгар тахса сырыттахпытына, кэргэним аҥаар атаҕар тобуктаан туран биһилэх ууммута уонна тапталыгар билиммитэ.
Вера уонна Власий Андреевтар
– Мин идэбинэн суруналыыспын. Горнайдааҕы «Үлэ күүһэ» хаһыакка үлэлии сылдьан кэргэммин Власийы кытта билсибитим. Ол саҕана кини саҥардыы саҕалаан эрэр фермер этэ. Инньэ гынан, икки төгүл ыстатыйам дьоруойа буолбута. Оттон билигин олоҕум дьоруойа буолар. Тапталыгар аан бастаан төлөпүөн нөҥүө билиммитэ. Көрөн туран этэрин кыбыстыбыт этэ. Мин ол иннинэ ыстатыйам дьоруойа эрэ курдук саныы сырыттаҕым дии. Эрийэн эппитигэр мух-мах баран, төлөпүөммүн ол да ууран кэбиспитим. Онтон олунньу 14 күнүгэр торт, сакалаат кэһиилээх тиийэн кэлбитэ. Ол кэнниттэн улам билсэн, көрсөн тапталбыт остуоруйата саҕаламмыта.
Августина уонна Петр Илларионовтар
– Кэргэним Аармыйаҕа сылдьан куруук эрийэр этэ. Ол кэмҥэ саҥа билсэ сылдьарбыт. Биирдэ Иван Арбита «Долгуннар» поэматын нойосуус ааҕан соһуппута. Кини тапталын ордук хоһоонунан, ырыанан биллэрэр.
Мария уонна Николай Гольдеровтар
– Биирдэ иккиэн хаама сырыттахпытына, суол кытыытыгар маҥан дьүһүннээх карета-массыына турар этэ. Мин массыынаны көрөн баран, испэр көрүдьүөс баҕайы дии санаабытым. Оччолорго, нууччалыы эттэххэ, “конфетно-букетный период” кэмэ этэ. Арай, киһим ол массыына диэки хааман барда. Мин чугастан көрөөрү гынар дии санаатым. Онтум олох да массыына аанын арыйда уонна: “киириэххэ”, – диэтэ. Оннук кып-кыраһыабай массыынаҕа киирэн олорунан кэбистибит. Ити курдук, тапталыгар билинээри “оригинальнай сюрприз” толкуйдаабыт этэ.
Венера Охлопкова
