Олус минньигэс уонна астыырга чэпчэки туорт.
Астыырга ирдэнэр:
• Сымыыт — 2 устуука
• Саахар — 150 — 200 г
• Мас арыыта — 100 г
• Аалыллыбыт моркуоп — 170 — 180 г
• Бурдук — 160-170 г
• Корица — 1 кыра ньуоска
• Туус — 1/3 кыра ньуоска
• Көпсөтөр — 1 кыра ньуоска
• Суода — ½ кыра ньуоска
Биһилигэ:
• 82 % ынах арыыта — 100 г
• Иэдьэгэй (творожный) сыыр — 350 г
• Мэлии саахар — 50 г
• Грецкэй эриэхэ — 60 г
Безе:
• Сымыыт үрүҥэ — 3 устуука
• Саахар — 150 г
Астааһына:
1. Моркуобу аалабыт эбэтэр блендер көмөтүнэн илдьиритэбит.
2. Миискэҕэ саахары уонна мас арыытын кутан 3-4 мүнүүтэ устата ньыһыйтарабыт, сымыыты биирдиилээн эбэбит. Бүтүүтүгэр тууһуубут.
3. Сиидэлэммит бурдукка көпсөтөрү, суоданы уонна корицаны эбэбит. Баҕарар буоллаххына, мускатнай эриэхэ, кардамон кутуоххун сөп. Корицаны сэҥээрбэт буоллаххына, 1 апельсин хаҕын аалан кутуоххун сөп. Үчүгэйдик буккуйабыт. Саамай бүтэһигэр моркуоппутун эбэбит. Тиэстэ убаҕас соҕус буолуохтаах.
4. Тиэстэни 2 гына арааран араас кээмэйдээх төгүрүк халыыптарга кутабыт.
5. 180 кыраадыска диэри сылыйбыт духуопкаҕа 20-25 мүнүүтэ буһарабыт. Буспутун-буспатаҕын мас үтэһэнэн анньан көрөбүт.
6. Аспытын сойутабыт уонна кытыытын тэҥнии таарыйа, үрдүгэр бытарытарга анаан тоорумастары быһабыт.
Биһилик:
Ынах арыытын мэлии саахары кытта сырдыар уонна көпсөркөй буолуор диэри ытыйта-
рабыт. Кыралаан иэдьэгэй сыыры эбэбит.
Сааһылааһына:
Улахан бискибиит үрдүгэр биһилик 2/3 биһэбит, ол үрдүгэр кыра бискибиити ууран ба-
ран, эмиэ биһиликтиибит, кытыыларын умнубаппыт. Тоорумастары бытарытабыт, грецкэй эриэхэни кыратык ыһаарылыы түһэн баран, эмиэ бытарытабыт. Туорт кытыыларыгар тоорумастар кыырпахтарын, үрдүгэр бытарытыллыбыт эриэхэни таммалатабыт. Кытыыларыгар киэргэтэн безе уурталыыбыт. Бэлэм туорду сөрүүн сиргэ хас эмэ чааска туруоран, сойутабыт.
Безе астааһына:
1. Сымыыт үрүҥүн араҕаһыттан араарабыт. Кып-кыра даҕаны араҕас түһүө суохтаах.
2. Сымыыт үрүҥүн ыраас уонна кураанах иһиккэ түһэрэбит. Миксеринэн ытыйабыт.
3. Сымыыт үрүҥэ сыыйа сырдыаҕа уонна көпсөркөй буолан барыаҕа. Ытыйарбытын тохтоппоко, саахар эбэбит уонна 6- 7 мүнүүтэ эриттэрэбит.
4. Маассабыт хойдуохтаах, миксер ытыйар тимирин суола хаалар буолуохтаах.
5. Халыып үрдүгэр ас кумааҕытын тэлгэтэбит уонна кондитерскай мөһөөччүк көмөтүнэн кыракый тоорохойдору түһэртиибит.
6. 90 кыраадыска диэри сылыйбыт оһоххо 2 чаас кэриҥэ туруорабыт.
Сүбэ:
Безены эрдэ, биир күн иннинэ оҥорон бэлэмнээн кэбиһиэххитин сөп.
БЕФСТРОГАНОВ
Бефстроганов – Арассыыйа дьоно-сэргэтэ сөбүлээн астыыр, аһыыр бүлүүдэтэ. Луук, тэллэй эбиликтээх, ынах арыытыгар буспут уһун синньигэс эт кырбастара минньигэстэрэ сүрдээх.
Астыырга ирдэнэр:
• Ынах этэ — 1/2 кг; мантан элбэх буолуон сөп
• Эриэппэ луук — 1 устуука
• Шампиньон — 150 г
• Сүөгэй (сметана) — 80 г
• Ынах арыыта — 4 ул. ньуоска
• Туус, биэрэс сөбүлүүргүнэн
• Уу — 1/3 ыстакаан
Астааһына:
1. Эти уһун синньигэс гына сааһынан кырбастаа.
2. Кырбастаммыт луугу ынах арыытыгар 5 мүнүүтэ устата ыһаарылаан ыл.
3. Тэллэйи кут, 2 мүнүүтэ кэриҥэ ыһаарылаа.
4. Эт кутабыт уонна күүстээх уокка 2 мүнүүтэ курдук ыһаарылыыбыт.
5. Сүөгэйдээ, тууһаа, биэрэстээ уонна оргуйбутунан ууну кут.
6. Бу симэһиҥҥэ 5–10 мүнүүтэ буһар.
7. Бефстроганов ньыһыллыбыт хортуоппуйу, оҕуруот аһыттан салааты кытта барсар.
Оҕуруот аһыттан пюре:
• хортуоппуй — 500 г
• моркуоп — 200 г
• туус — сөбүлүүргүнэн
• ынах арыыта — 50 г эбэтэр мас арыыта — 2 ул. ньуоска
• үүт — 1 ыстакаан эбэтэр оҕуруот аһа буспут уута — 1 ыстакаан
• кырбастаммыт укроп, петрушка
Астааһына:
1. Моркуобу, хортуоппуйу ыраастыыбыт уонна кырбыыбыт.
2. Оҕуруот аһын тууһаан баран, ууга 40 мүнүүтэ устата буһарабыт.
3. Буспутун кэннэ уутун сүөкээн ньыһыйабыт, арыылыыбыт, итии үүт кутабыт уонна буккуйабыт.
4. Остуолга уурарга күөх туманан киэргэтэбит.
БУСПУТ СЫА
Буспут сыа — түргэнник астанар ас.
Астыырга ирдэнэр:
• Сыа эбэтэр түөс этэ — 500 г
• Туус — 100 г
• Хара биэрэс — 1 улахан ньуоска
• Чеснок — 4 өлүүскэ
• Лавр сэбирдэҕэ — 2-3 устуука
Астааһына:
1. Сыаны кыра соҕус өлүүлэргэ араартыыбыт.
2. Туманы бииргэ буккуйан баран, сыаҕа биһэбит. Үрдүгэр лавр сэбирдэҕин уурабыт уонна 4 чаас устата хаппахтаан баран туруорабыт.
3. Духуопкаҕа астыырга аналлаах салаппаан иһигэр угабыт уонна үчүгэйдик салгын киирбэтин-тахсыбатын курдук баайабыт.
4. Тымныы уулаах миискэҕэ угаммыт кыра уокка 1,5-2 чаас устата буһарабыт.
5. Салаппааныттан хостуубут, сойутабыт уонна холодильникка түүн устата хонноробут.
6. Синньигэс гына кырбастаан килиэби, хортуоппуйу кытта сииргэ олус үчүгэй. Астаан боруобалаарыҥ.
ТУҺАЛААХ САЛААТ
Олус минньигэс уонна доруобуйаҕа наадалаах салаат. Сарсыардаттан киэһээҥҥэ диэри төһө баҕарар сиигин!
Астыырга ирдэнэр:
• Брокколи — 1/4
• Пекин хаппыыстата — 1/2
• Буспут сымыыт — 2 устуука
• Помидор — 2 устуука
• Олива арыыта — 2 ул. ньуоска
• Хартыыһа — 1 кыра ньуоска
• Лимон сүмэһинэ — 1 кыра ньуоска
• Туус, хара биэрэс — сөбүлүүргүнэн
Буулачыкалары астааһын:
1. Брокколины ыраастаан баран 3-4 мүнүүтэ устата буһаран ылабыт. Уутун сүөкээн сойутабыт.
2. Пекин хаппыыстатын синньигэс гына кырбыыбыт.
3. Помидору солуомалыы, сымыыты бөдөҥ гына кырбыыбыт.
4. Барытын миискэҕэ бииргэ буккуйабыт, олива арыытын, хартыыһаны, лимон сүмэһини, тууһу, биэрэһи эбэн иккистээн буккуйабыт. Салаат бэлэм.
Татьяна Пестрякова
