Бүгүҥҥү кэпсиир дьиэ кэргэним Евгений Валерьевич, Евдокия Анатольевна Васильевтар Ньурба оройуонун Октябрьскай нэһилиэгэр олороллор. Ыал аҕата Евгений Васильев Ньурба Мархатыттан, ийэлэрэ Евдокия Анатольевна Ньурба Антоновкатыттан төрүттээхтэр.
Евгений Васильев «Дьарыктанар киһи тугу барытын туһаҕа таһаарар”, — диир. ССРС саҕанааҕы быраҕыллыбыт катангалары (халыҥ боробулуохалары) хомуйан, кыраһыабай табаны, кэлэр сыл бэлиэтин Оҕуһу оҥорон, гирлянданан киэргэтэн, оҕолорго олус кыраһыабай көстүүлээх Саҥа дьыллааҕы бэртээхэй бэлэҕи бэлэмнээбитэ. Евгений оҕо сааһыгар пластилинынан фигуралары оҥорон оонньуура билиҥҥи дьарыгар туһалаатаҕа буолуо.
«Удьуоргар уустар бааллар этэ дуо?» — диэн ыйытыыбар: «Хатыыттан төрүттээх эһэм Иван Васильевич, таайым Иван Иванович Еремеевтэр мас уустара, Мархаҕа олорор убайым Васильев Вячеслав Валерьевич ИП тэринэн мастан арааһы бары оҥорор, Ньурбаҕа олорбут эһэм Антонов Николай Васильевич эмиэ маһынан уһанара. Эһэм эдьиийэ, норуот маастара Мария Васильевна Антонова маһынан да кыһар, кылынан, сиэлинэн кытта олус айымньылаахтык үлэлиир. Төрөппүттэрим Мархаҕа олороллор. Аҕам Валерий Васильевич суоппар, ийэм Любовь Николаевна учуутал идэлээхтэр. Ийэм иистэнэр, мин аҕабын удьуордаан тимиргэ сыстаҕаһым буолуо. Оскуолаҕа үөрэнэ сылдьан маһынан уһанар этим, хотойум, аҥырым музейга бааллар, быһаҕым ВДНХ быыстапкатыгар турбута. Онтон саахымат бэлэх кэлбитэ. Онон удьуор салҕанар», — диэн хоруйдуур.
Евгений Валерьевич боруота оҥоруунан дьарыктаммыта быйыл номнуо 10 сыла буолбут.
“ Кэнникинэн сиэмэнинэн бетон оҥоһуктары оҥоруунан дьарыктанар буоллум. Оҥорбут фонтаным атын улууска киэргэйэн турар. Кыһын бетон үлэтэ тохтуур, үчүгэй мастарыскыайдаах киһи сылы эргиччи үлэлэтиэ этэ, — диэн ыал аҕата дьарыгын туһунан кэпсиир.
Ааспыт саас кулун тутар ыйга, Аан дойдутааҕы Дьахталлар күннэригэр Н.И.Харитонов аатынан «Кыталык» култуура дыбарыаһыгар ыытыллыбыт тэрээһиҥҥэ ыал ийэтэ Евдокия Анатольевна гиипсэттэн оҥоһуктарын дьоҥҥо-сэргэҕэ билиһиннэрэ туруорбута. Кини гипсэнэн дьарыктаммытым биир сыл буолла. Бу сайын бастакы маастар-кылааспын ыыппытым. Дьон үлэлэрбин сэҥээрэн атыылаһар диэбитэ.
Евдокия Анатольевна уйулҕа үөрэхтээх, үс сыл оҕотун көрөн олорон баран быйылгыттан «Туллукчаан» оҕо уһуйааныгар үлэлиир.
— Кэргэмминээн Евгенийдиин 2013 сыллаахха ыал буолбуппут, икки уол, биир кыыс оҕолоохпут. Икки оҕобут оскуолаҕа үөрэнэр, кырабыт уһуйааҥҥа сылдьар. Оҕолорбутунаан дьиэ ис-тас үлэтигэр бары бииргэ сылдьабыт. Биһиги дьиэ кэргэҥҥэ кыыс, уол үлэтэ диэн араарыы суох. Кыыспыт уруһуйдуурун сөбүлүүр, улахан уол футболу сэҥээрэр.
— Ийэ киһи быһыытынан ас астааһына, дьиэ ыраас, тупсаҕай көрүҥнэнэригэр кыһаллабын. Аҕабыт тиэргэҥҥэ үлэлиирин таһынан, кыраһыабай оҥоһуктары оҥорон дьиэ тас көрүҥүн тупсарар. Уопсай үлэҕэ оҕолорбутунаан тэҥҥэ үлэлиибит. Иккиэн оҕо иитиитигэр болҕомтобутун ууран, оҕолорбутун өйүүбүт.
Бүгүҥҥү дьоруойдарым дьиэтээҕи үлэлэрин таһынан иккиэн дьоҕурдаах буоланнар анал дьарыктаахтар, оҥорбут оҥоһуктарын дьон биһириир. «Саха сатаабата суох» диэн этии кинилэргэ чахчы сөп түбэһэр.
Антонина Семенова
