Биһиги сурунаалбыт “Саха саарыннарын далбар хотуттара” рубрикатын ааптара, тыл билимин дуоктара, Хотугулуу-Илиҥҥи федеральнай университет саха литературатын кафедратын сэбиэдиссэйэ, Саха Өрөспүүбүлүкэтин култууратын үтүөлээх үлэһитэ, Алампа аатынан уопсастыба бириэмийэтин лауреата, Бүлүү улууһун Өкүндү уонна Таатта улууһун Дьохсоҕон нэһилиэктэрин бочуоттаах олохтооҕо, СӨ суруйааччыларын сойууһун чилиэнэ Валентина СЕМЕНОВА бүгүн Саха тыйаатырын кэлэктиибигэр Алампа олоҕун, айар үлэтин туһунан икки чаас устата ирэ-хоро кэпсээтэ.
Санатан эттэххэ, Валентина Григорьевна “Далбар Хотун” 2025 сыллааҕы нүөмэрдэригэр улуу киһибит Анемподист Софронов-Алампа тус олоҕун туһунан суруйбут ыстатыйалара ааҕааччы киэҥ сэҥээриитин ылбыттара. “Далбар Хотун” лекторийын чэрчитинэн ааптарбыт Алампа туһунан баай ис хоһоонноох, элбэх хаартыскалардаах лиэксийэтин Нам улууһун олохтоохторугар ааҕан турар.
“Далбар Хотун” лекторийа үлэтин салгыыр былааннаах.
