Күһүн атырдьах ыйын ортото ааһан эрдэҕинэ, иккис оҕобун оҕолоноору балыыһаҕа киирдим. Эдэрбин, сүүрбэччэ саастаахпын. Оччолорго улуус киининээҕи оҕо төрөтөр дьиэ өрөмүөҥҥэ баран, чугастааҕы дэриэбинэҕэ көспүт этэ. Онно тиийдим. Барарбар ийэм ол дэриэбинэҕэ олорор таайым аахха суруйуом, наада буоллаҕына, билсиһиэҥ буоллаҕа диэн этэн ыытта.
Оҕолоннум, уолланным. Ардах бөҕө. Арай, биир сарсыарда «эйиэхэ сурук кэллэ» диэтилэр, аҕалан биэрдилэр. Кэмбиэрдээх, халыҥ соҕус сурук. Арыйдым. Аахтым.
«Күндү Жанна, дорообо! Оҕоломмуккунан эҕэрдэлиибит, этэҥҥэ буолуҥ» диэн үөһэ өттүгэр суруллубут. Муодарҕаатым. Салгыы ааҕабын: «Бу Костя Т. ийэтэ суруйабын. Бука диэн, соһуйума. Сатаммат соҕус өттүттэн этэрим буолуо. Биһиги уолбут Костя армияҕа барбыта сылтан орто ээ. Хаһан, ханна билсибиккитий? Эһиги дойдугут диэкиттэн билэр киһилээхпин диэбэт этэ. Үөрэммэтэҕэ эҥин. Оскуола кэнниттэн тута аармыйалаабыта. Туох эрэ алҕас тахсыбыт быһыылаах. Бары үчүгэйи баҕарабын».
Аатын суруйбут. Туох эрэ уолукпун бүөлүү аста. «Бу тугуй? Туох суругуй? Ханнык Костя? Хайдах буолбуттарый… тугун дьиибэтэй…» Онтон эмискэ ийэм суругун өйдүү биэрдим! Арбыы-арба… Кэмбиэр иһиттэн ийэм суругун холбуу укпуттарын сулбу тардан ыллым.
«Тарасовтар, дорооболоруҥ! Бу Б..-тан Марина Иннокентьевна суруйабын. Кэммитинэн олоробут. Итиннэ биһиги кыыспыт Ж.. оҕолоно киирдэ. Иккис оҕото. Бу сурук тиийиэр диэри оҕолоноро буолуо, баһаалыста, ону билсээриҥ. Төлөпүөннүө эбиппин даҕаны, нүөмэргитин билбэппин». Ийэм адаархай буочарынан бэрт кылгастык, чуолкай гына суруйбут.
Олорон эрэ эргитэ санаатым. Тоҕо ийэм суруга атын дьоҥҥо тиийдэ? Сэрэйдим – таайбыт уонна ити Костя диэн уол ааттара үүт-үкчү буолан, сыыһа-халты тиийбит эбит. Тыый, төһө эрэ соһуйдулар!? Палаатаны хомуйар үчүгэй баҕайы майгылаах
Клавдия диэн ааттаах санитаркалыыр, мэдиссиинэ бэтэрээнэ дьахтарга кэпсээтим. Сүбэлэстибит. Кини суругу таайым аахха тиэрдиэх, аармыйаҕа сылдьар уоллаах дьоҥҥо сылдьан, почта сыыспытын быһаарыах буолла. Өссө баран иһэн почтаҕа таарыйан сэмэлиэх, саҥа оҕоломмут дьахтары долгутар сатамматын өйдөтүөх буолла…
Олоххо олус да ыраас, сырдык санаалаах, аһаҕас сүрэхтээх дьон бааллар! Ханна да сылдьыбатах уолларыттан «оҕоломмут кыыс туһунан» соһуччу ийэтиттэн истэн, биллибэт кыыска суруктара хайдах курдук сэмэйий?! Билигин да санаатахпына, сырдыыбын, үөрэбин. Олохпор буолар араас түгэннэргэ ити Ийэни саныы түһэбин, тыын ылан, кэҥиибин-уһуубун…
Хаар Эбэ
